20buba Hornbill Fest nung plastic mamshitsü

Kohima, November 28 (TYO): 20buba Nagaland Hornbill Festival December 1 nungi tenzüka December 10 tashi agitsü, aser taküm nungibo iba benjung mapang nung plastics mamshitsü, ta ketdangsertem osang ka ajanga metetdaktsü.
‘Festival of Festivals’ ta ajaba Hornbill Festival ya state sorkari kümshia tourism ajungkettsütsü atema ayongzükba sentong ka lir, aser iba benjung nung Nagaland nung takar sobaliba sayar.
Brihostibarnü Tourism Office, Kohima nung osangbenertem den jembidang Tourism aser Art & Culture Advisor, Khehovi Yeputhomi-i, Hornbill festival ya district pongu – Kohima, Dimapur, Mokokchung, Phek aser Wokha nung agitsü aser tongti benjungji Kohima-Imphal National Highway-2 nungi kilometer 12 shi pilar aliba Naga Heritage Village nung agitsü, ta metetdaktsü.
December 1 nü mezüngnü benjungji Statehood Day anogomong nüngtem nung anepdang 8:30 nung Kohima Local Ground nung agitsü aser benjung tetenzük sentongji nikongdang 4:00 ako nungi Kisama Heritage village nung agitsü, ta pai metetdaktsü.
“Takümbo benjung tetenzük sentong atema kanga tongtibang nisungtem (VVIPs) majar saka tanüngba anogotem nungbo parnok adentsü,” ta pai metetdaktsü.
Iba benjungmong nung Nagaland nung tongti tribes 17-i anogo ti tashi sobaliba sentongtem nung shialem agiba dak alia North East Zone Cultural Centre-i NE state balala nungi shilem agidaktsütsü; iba denji külemi linük tesem balala nungi aser Thailand o Hungary nungi cultural troupes-i shilem agitsü, ta pai metetdaktsü.
Iba benjungmong nung tongti host aser host ji Nagaland Angh R N Ravi aser Chief Minister Neiphiu Rio na asütsü.
Iba benjungmong atema Nagaland sorkari sen crore 5 lemzüktsüogo.
Iba benjung ajanga sen ajangzüktetba dak sendakba nung tasüngdangba ka langzüdang Yeputhomi-i, sorkari sen maazüker saka sen aazüktsü atema lisopur shishilembartem nem sabang agütsür; yaküm iba benjung nung sen ajak agi crore 45 shi aazük, ta metetdaktsü.
Taküm Airbnb den MoU ka sign süogo, anungji takümbo linük aser bendanglen nungio raliwalirtem taküm timba arutsü imlar, ta paisa shisem.
Yaküm iba benjung semdanger 2,51,701 liasü, aser item rongnung bendanger 2,702, linük nungi raliwalir 37,397 aser lisopur 2,11,602 liasü.
Additional Director aser HoD Tourism Department, Akhale Vizol-i, Kohima nung Hornbill Night Bazaar densema Naga Heritage Village Kisama ya “Plastic Free Zone” asütsü, ta metetdaktsü.
Laisa, Tourism department-i hornbill festival atema jenjang telatet agütsüogo aser ibaji junga benoktsü, ta metetdaktsü.