Kija Taküm Otsü : P. Jongpong Jamir, IPS IGP (Retd)

Tekolok nung kaket ka asameyanga shidanger asangsang nung zülua alima dangi perokshitsübaji mapa kanga tulu, aji saka ibaji inyaktsü asoshi pen aser paper ka dang nungdaker. Khen ashitsübo iba mapaji kanga temela aser meimchir ajaki inyaktettsüba mapa ka mesuka lir. Aji oda suaka kaket ka zülua renemtettsüba nungji timtem aika keta lir. Asenoki kaket azüngdang tezülurji koba amala timtemsa agirang iba jenjang ya tongtet ta meshisadanger dangashi anibelem aika ajanga orrang kaket kaji renemteter. Tawa asen lenir wabong P. Jongpong Jamir, IPS IGP (Retd)-i züluba Kija Taküm Otsü (auto biography) kaket ya jangratema züngogo aser ibai kaket tajung ka lir. Pai inyakba literature ministry ya tesungmangtsüka lir.
Kaket ya ajakibo mazünger, ibaji asüngdangra nisung shiai kuli balala agutsütsü. Aji saka shirnoki kaket tajung züngnur iba kaket ya züngang, tazünger ajak tajangzük angutsüsa iba kaket ya züluteta lir. Kija Taküm Otsü kaket azüngdang asen lenir ya koba amala kibong ka nungi adok ibaji meteta arudang tongtibangsa ibai tanu lanuasensortem asoshi tayongzükba (challenge) tulu aketba kaket tajung ka lir ta bilema tzüratema züngogo.
Asen lenir ya rishir ka lir, aji saka pai aremzüka sarasadema iba ama atangjibala kaket tajung zülua yutsüba asoshi tenungsang tulu agutsür. Iba kaket ya tanu aser tarutsü lanu putu ajak asoshi tayongzükba tulu aketba aser taküm lungzük tajung ka asütsü. Asenok lanu asensortemi kaket züluri ajangdanga aoba tsüngsu ya shisadanga iba kaket züngra ajak asoshi lesson tulu asütsü ta bilemer. Asen nuburtem asoshi Tsüngremi lenir taküm aser kibong arishi temjenjangma ta moatsür. Shirnokisa iba kaket ya ano mezüngshi bushia azüngtsü junger. Yangi senti shisatsü aika keta lir.

– Wb. P. Alem Jamir, Dimapur.
Dt. 25/11/19