Khuzama nung police-i Poppy Straw seret 3,430 apu

Dimapur, November 29 (TYO): November 28, 2019 nü Inter-State Excise checkgate Khuzama, Kohima nung Narcotic Cell, Excise department Nagaland-i Poppy Straw seret 3,430 puogo; aser iba ya state nung temesepba mozü timtiba apuba rongnung ka asütsü, ta Deputy Commissioner of Excise Nagaland, Dimapur, S. Chanlei Angh-i sangdong ka ajanga metetdaktsü.
Intelligence osang nung ajemdaker Excise Narcotic Cell duty party-i gari tsüng 10 aketba truck (registration No. RJ-06 GB 1598) ka Inter-State Excise checkgate Khuzama nung soiter mita reprangdang bosta telung nung süngjanglilang takong agi mimbanger aliba Poppy Straw seret 1,900 angu; iba dak sendakba nung gari anisang arishi küm 36, Narendra Singh (S/o Ramjilal Singh of Gwalior, Madhya Pradesh) apu aser NDPS Act 1985 kübok ken o benoka maneni bushisüngdangdar, ta sangdong nungsa shia lir.
Kasa mapang nungsa ano garitsüng 10 aketba tanabuba truck (registration No. RJ 19 GA 3943) anisangi gariji gate nungi pilar anena ayuba sülen aremleni jena oadok, aser iba gariji mita bushidang kasa duty party-i Poppy Straw seret 1,530 Kgs wheat Bran agi mimbanga aliba angu, ta sangdong nung shia lir.
Iba dak sendakba nung temesepba mozü (narcotic drugs) ji apu aser jena aosang anema arrest warrant agütsüba den NDPS Act 1985 kübok maneni bushisüngdangdar, ta sangdong nung shia lir.
Poppy Straw seret 3,430 ji sen lakh 34 shi asütsü. Excise Narcotic Cell duty party nung züngsemtemji AIE Kenzeu Lungalung, head constable Tovika aser constables- Mangyang, Amos, Tongang, Tokaho, Shikaho aser Mungnyu nunger liasü.