College temi ANCSU den meyariteptsü

Dimapur, November 29 (TYO): Taküm ANCSU mungdang aser election nung Election Commission-i ANCSU Constitution alema mapa inyakogo aser iba ajanga kaketshirtem temulung yirutsüogo ta college 10 nungi tanishirtemi sangdong ka nung ashi.
Election Commission-i kanga dang tim mesüi inyak aser iba jagi ANCSU elections kanga mejungi menentsüogo, ta parnokisa ashi.
Election agitsü jakdang college principal temi countersign ser recommendation letters agütsü saka itemji magizük. Parnoki recommendation letters ji xerox asü aser tashiyim agi General Secretary tem nem sign südaktsü aser Assistant General Secretary tem nem duplicate recommendation letters agütsüdaktsü. Ano, General Secretary tem nem vote meinokdaktsü, ta kaketshir lennirtemi ashi.
Election Commission-isa election mapang tashiyim amshi aser riot police force mapa lemzüktsü. EC aser taoba ANCSU president nungertemi tuyuba nung ajemdaker kaketshirtem mungdang agidak nungi meindok, ta parnokisa shisem.
Election Commission-isa college karbo menur aru ta shir vote meinokdaktsü saka ano menur aruba college kar nembo vote enokdaktsü. ANCSU mungdang ya kaketshirtem adenshir kaketshirtem ajungkettsü atema tebilembatem benoka lemsateptsü sabang ka lir saka tawa agiba mungdangbo khenyongi balaka liasü. Police tashi amshiba ajanga kaketshirtemi temulung tsübudaktsü aser temulung mesüngjemteti kümdaktsü, ta parnokisa ashi.
Onoki Tribunal General ajanga ANCSU Office dangi mepelaba onüktem agütsü aser mapa teinyaktsü tim iyaktsü ashi, saka parnoki kecha meinyak nung onoki ANCSU den meyariteptsüsa akümer, Modern College Students’ Union Kohima, Capital College of Higher Education Kohima, Model Christian College Students’ Union Kohima, Salt Christian College Dimapur, Unity College Student’s Council Dimapur, Pfutsero Govt College Pfutsero, Phek Govt College Student Union Phek, Peren Govt. College Student Union Peren, Mount Tiyi College Wohka aser Bailey Baptist College Wokha kaketshir tanishirtemi ashi.