Defence Expo atema Lucknow nung süngdong 64,000 lensüktsü

Lucknow, November 29 (Agencies): Alima nung mopong temenentiba yimti 10 rongnung Lucknow densema liaka Uttar Pradesh state sorkari Defence Expo atema Gomti ayong anasa süngdong 63,799 lensüktsü.
Defence Expo ya sangküm February 5-8, 2019 anogotem nung Uttar Pradesh yimtiba, Lucknow yimti nung agitsü.
Lucknow Development Authority (LDA)-i shidi ka ajanga Lucknow Nagar Nigam dang Hanuman Setu nungi Nishatganj apu tashi nung aliba süngdongtem lensükang, kechiyong Defence Expo mapang yangji sentong aika agitsü, ta metetdaktsüogo.
Süngdongtem lensükba sülen item lushi nung Hindustan Aeronautics Limited (HAL)-i Defence Expo atema maparen inyaktsü.
LDA-isa, iba Expo tembangba sülen süngdong tasen atemtsü, ta metetdaktsü.
Iba tesem nungji süngdong tasen atemtsü atema LDA-i Nagar Nigam dang nungi sen lakh 59 meshiogo.
Shidi ajanga LDA secretary, M P Singh-i, Gomti ayongküm nung süngdong atemdang parnoki sen lakh 59 indoka liasü ta metetdaktsü.
Ano külen Forest ketdangsertemibo, tan mongpu mapang nung süngdong atsüteter tanga tesemi belener oa atemtsüji tamakoktsü, ta shiogo.
“Süngdongtemji belenshira süadoksü,” ta forest ketdangser kati ashi.
LDA-i sangküm January 15 tashi nungbo süngdong ajakji lensüka moapu kümdaktsüner.
Tang mezüng Lucknow nung Defence Expo ayongzüka akatsü aser iba sentong nung India nunger defence tashi sayutsü atema linük aika jaoktsü.