NRC nungi züngdokba Hindu Bengali nunger metetdaktsütsü: Sarma

Guwahati, November 29 (Agencies): Assam nung final National Register of Citizens (NRC) nungi züngdokba Bengali Hindu nunger yimjak nung metetdaktsütsü, ta Assam finance minister Himanta Biswa Sarma-i ashi.
Assam Legislative Assembly indang Winter Session nung Sarma-i ashiba agi, state sorkari NRC nungi züngdokba Bengali Hindu nunger tenüngtem district lemsar bendenogo aser iba ya taoba mapang yimjak nung memetetdaktsüi liasü.
NRC nungi züngdokba Hindu Bengali nungerji Assembly metembang dang December 4 mesüra 5 nung metetdaktsütsü ta osang ajanga ashir.
“Onoki tang tagidak assembly session mapang iba mapa inyaktsü lemtetogo. Taoba mapang NRC teyangludak asüba agi iba mapa meinyaktet” ta Sarma-i ashi.
Brihostibarnü Assam Legislative Assembly indang winter session tenzükdang CAB aser NRC onüktem ajanga senden nunga magitet aser opposition party temi senden nung medeni kimai alu.
Congress aser All India United Democratic Front (AIUDF) MLA temi Speaker Hintendra Nath Goswami dang question hour melena Citizenship (Amendment) Bill aser National Register of Citizens onüktem benoka olemteptsü takhangba agütsü.
Ajisüaka, Speaker-i ibaji magizük aser iba jagi Congress aser AIUDF MLA temi yimyim ayima aser tezülubatem amer lungkak ait.
Assam finance minister Himanta Biswa Sarma-i osangbener dang CAB aser NRC atema ashiba agi “tang tagidak parliament session nung CAB ya Lok Sabha nung agizüktsü.”
Assam-a national NRC nung adentsü aser iba ya CAB sülen inyaktsü, ta Sarma-isa ashi.
NRC nung chichiba India senso aika tenüng agienogo, ta paisa shisem.