Cotton University kaketshirtemi CAB anema lungkak ait

Guwahati, November 29 (Agencies): Ashishitep aketba Citizenship Amendment Bill (CAB) magizüker ta sayua Cotton University kaketshirtemi tanü ola madoki lungkak aitba sentong ka agiogo.
Kaketshirtemi university kima nung tezüluba balala amer lungkak ait. Maneni, November 30, 2019 nü nüngtugu kentener Zubeen Garg-ia iba lungkak aitba sentong nung shilem agitsü.
Kaketshirtemi “CAB agienang’, ‘Nübortemi CAB anema noktaktsüla mesüra Assam ya Bangladesh akümtsü’ ta tezülubatem amer lungkak ait.
“Kin lemsaba bill ya onoki magizüker aser maneni iba anema noktaktsü” ta kaketshir kati ashi.
“Mapang kabo regional party AGP-i Bill anema noktak saka tangbo parnok ola mali kümogo. Nisung ajak tashi aginür aser lennirtemi Assam nung lisopurtem atema mebilemtsür” ta paisa ashi.
“Onoki Sarbananda Sonowal, Narendra Modi mesüra Amit Shah metsübur. Ozü lima kümzüktsü atema onoki akokba tashi inyaktsü” ta ano kaketshir kati ashi.
Hokolbarnü Home Minister Amit Shah-i Northeast nungi political party tem aser telok balala den senden ka amentsü jakdang, Northeast nungi Congress MP tem aser Naga People’s Front (NPF) MP temi Parliament kima Citizenship (Amendment) Bill anema lungkak aita liasü.