Sri Lanka terenlok atema India-i yaritsü: PM Modi

New Delhi, November 29 (Agencies): Hokolbarnü Sri Lanka Tir tasenba, Gotabaya Rajapaksa-i India Ato kilonser, Narendra Modi den security aser terenlok atema tezüngzüktep kar agiogo, aser item rongnung kiralongra anema raratsü atema senotsü teyari US sen million 50 agütsütsü densema lir.
Tanü Rajapaksa den senden amenba sülen Ato kilonser, Modi-i Sri Lanka nung terenlok projects balala inyaktsü atema Sri Lanka nem US sen million 400 apotsütsü sangdongba den külemi kiralongra anema raratsü atema US sen million 50 agütsütsü ta metetdaktsü.
Modi-i, “Ni Sri Lanka Tir dang par linük lenla ajak nung terenlok atema India-i yaritsü ta shiogo. India-i parnok sen million 400 apotsüba ajanga Sri Lanka renloktsü,” ta ashi.
Ano Rajapaksa-ia, “Senden junga kaogo. Security tsütsü amalitepa inyaktsü atema tongti ser o lemtepogo. Künatisa rongsenkettsüng tsütsü amalitepa inyaktsü bangjemogo,” ta metetdaktsü.
Taküm April ita nung Sri Lanka yimtiba, Colombo nung Easter Sunday anogo nung kiralongrartemi amakdang nisung 250 dak tema asüba sülen tang India-i kiralongra anema raratsü atema Sri Lanka nem senotsü teyari agütsür.
“Sorkar tasenba ajanga Sri Lanka nung Tamil nunger taginüba ataloktsütsü ta ni amanger,” ta Modi-i ashi. India atema dang masü saka Indian Ocean Region ajak atema Sri Lanka tashi itta alitsü nüngdak, ta Modi-i ashi.
“Ni India aser Sri Lanka na tsüngda tesendaktep ya temaba jenjang ka tongdaktsüner,” ta paisa shisem. Tanep Rashtrapati Bhavan nung Tir, Ram Nath Kovind aser Modi na densema ketdangsertemi Sri Lanka lenir agizüka liasü.