Indisen Baptist Arogo Dimapur tenlaki tasenba meshitetogo

Dimapur, Luchii/Dec. 01 (TYO): December 01, 2019 anogo Dimapur Ao Baptist Arogo sannüker Rev. I. Wati Jamir-i Indisen Baptist Arogo Dimapur (IBAD) tenlaki tasenba meshiteta lapoktsüogo. Iba tenlaki ya temolunger tenla aser sen apua (loan) 2017 küm yanglutsü tenzüka liasü. Iba tekülem ki ya sen crore pezü tema indoka renem aser nisung 1300 tashi amentsü akok. Maneni iba tekülem ki nung Arogo office atema takdang tenet dena lir.
Deobarnü iba tekülem ki meshitetba sentong nung jembiba mapang, “Koba Arogo nung tamangertemi Tsüngrem agizüktetsüsa litetdir, idakji Tsüngrem tashi dena lir. Iba Arogo ya Tsüngrem tashi jungkai adokba südaktsünura, Tsüngremi agizüktetba taküm ka litetsüla. Kodang Tsüngrem sengtsüwangshi tashi adokba tesem ka iba Arogo ya südir, iba Arogoji Tsüngremi moatsütsü,” ta Rev. Wati-i ashi.
Iba Indisen Baptist Arogo ya Indisen nung aliba sensotem dang masü saka tangar aienertem shirnokisa Tsüngrem teyari bushir, parnok atema tajangzük angüba Arogo ka südaktsüra, Tsüngremi iba Arogo tali moatsütsü. Asenoki kodang iba tenlakiji Tsüngrem nem tenüngsang agütsüba tesem kümdaktsür, idangji Tsüngremi moatsütsü, ta pai shisem.
Kasa sentong nung Arunachal Pradesh nungi MLA W. Lowangdong-i ashiba agi, Arunachal nung kin aika tammang tia nung liasü, saka Aoer missionary temi bendanga agütsür tenzükba ajanga parnoki tanü tesangwa ngur, ta ashi.
Arunachal nüburtem asoshi lenmang aisü nung yariba atema pai ABAM aser Indisen Baptist Arogo Dimapur tenüng asang aser paisa Indisen Baptist Arogo Dimapur yaritsü mulunga lir, ta shisem.
Iba tekülem ki tasenba takok ngua renemtetba asoshi kasa sentong nung deacon Dr. Benjong Imchen-ia kija aser lokti ajak dang pelaba lemsatepa liasü.