CM-i Multi Media Exhibition semzüktsüogo

Kohima, December 01 (TYO): Mahatma Gandhi sor küm 150 ajungbamong nüngtem nung December 1 nü World War II museum, Kisama nung Nagaland Chief Minister, Neiphiu Rio-i Multi Media Exhibition sentong tenzüktsüogo; iba sentong ya Regional Outreach Bureau, Ministry of I&B, Kohima-i ayongzük, ta ketdangsertem osang ka ajanga metetdaktsü.
Iba sentong ayongzükba nükjidong ya nüburtem nem Gandhi indang tesayuba aser tangatetbatem metetdaktsütsü atema lir.
Hornbill festival benjung anogo nung asür, Natwar Thakkar bilemteta par jabaso, Dr. Aotoshi nem tetushi agütsü. Asür, Thakkar dang ya Nagaland indang Gandhi ta jaa liasü aser pa akümli mapang nung pai Gandhi tesayubatem aser tangatetbatem benshi aser lokltiliba tajungba akümtsü atema mapa tajung aika inyaka liasü. Asür Thakkar ya 1932 küm Maharashtra nung aso aser pai Nagaland ya pa talidak küma Gandhi tesayubatem aser yimjung proktsü atema 1995 küm pai Mokokchung District kübok Chuchuyimlang yimdak Nagaland Gandhi Ashram tenteta liasü.
Sensak tia nung alirtem aser matamabensartem atema Thakkar-i anibelem kanga arema inyakogo.
Paisa loktiliba nung züngdokbapurtem aser matamabensartem nem vocational training agütsü. Iba denji külemi, yimtsüngtem nung primary school, medical centres, libraries aser khadi sale counters lapokja liasü.
1999 küm Thakkar-i Padma Shri award angu aser pa kinungtsü social worker, Lentina Ao nem-a Padma Shri agüja liasü.
Lokti pelaa agizükba o jembidang Director General, Ministry of I&B, GoI, Dr. A.M Farooqi-i, Ministry-i Natwar Thakkar-i inyakba mapatem, pa taküm otsü aser Mahatma Gandhi tangatetbatem nung ajemdaker inyakdang pai ajangshibatem exhibition ajanga sayatsü merangogo, ta metetdaktsü.
Farooqi-isa, India sorkari Gandhi tesayubatem linük aser alima sabang tashi nung proktsü atema pa sor küm 150 ajungbamong amonger, ta metetdaktsü.