Nagaland tasenba ka

Nagaland yashi December ka nü küm 57 ajungba salem osang nung, Nagaland angh Wb.R.N.Ravi-i Nagaland nung otsüsütsüsa Nagaland tasenba ka yakta asenoki angutsü ta metetdaktsübaji yimbazüa angar toktsütsüba otsü masü. Pa ya Nagaland angh dang masü saka Naga yimten tebilemtsü koka telatetba kati arutsü atema India government tenüng nung Naga nunger yimten nüchiso bushirtem den jembisang lir. Ibayongji, tangbo paiang Nagaland aser Naga nunger jakla aser tensa tiaji tajungba meteta lir. Atangji, India ato kilonseri bilemba ama inyaktet asübo, tang yabo Naga yimten jenjang tasen ka latetter süla, ajisüaka Naga nunger ken o nung ka küma longjemer India den mejembitetba agi tang tashi Naga yimten telatetba kati maruteti lir. Ken o jemdidak medenaka, parnoki jembiba nung angatetba agi, joko Naga nunger linük tenzükertem o India government na tsüngdabo tejembitsübo ajak jembiadokgo aser sign süteptsü dang anünga lir. Aji oda, Nagaland angh o nungi angatetba agia, memenui Naga yimten tasen ka latettsü. Iba Nagaland tasenba nungjibo nübortem tetsübu nung malitsü aser government mapa nung inyakertema nübortem tenzükba wadang nung züngzünga inyaktsü. Iba Nagaland tasenba nungjibo temzüng ozüng shitak amshitsü aser ochimashi mapatem kecha miimshia meinyaktsü ta angh-i ashiba nungji tangatettsü tuluka lir. Pai ashiba o nungji, tarutsü Nagaland tasenba indang kisüng yimdangi arua ashir masü saka tang asenok aliba Nagaland tensa tia indang dena ashir ta angatetter. Yakta arutsü aliba Nagaland tasenba nungjibo temzüng ozüng shitak amshia tenzüktsü ta asüba tetezüji tanü aliba Nagaland nung yabo temzüng ozüng shitak mamshitetter ta ashirba lir. Atangji, tanü aliba Nagaland nung yabo auer süngsü tuluba, anungji aueri kibur tsübur masü saka kiburiang auer tsübur. Tanü aliba Nagaland nung yabo ochishia inyakerbo kanga menütsür saka ochimashi inyakertem nembo ken den mejema tenlokja tushir. Angh-isa Nagaland tasenba nungbo prangpong tsübuba, tashidak tsübuba aser mapa tulu tenzüka inyaktsü tsübuba tetsübu malitsü ta ashiba tetezüji tanü Nagaland nung yabo tetsübu agi sünga lir. Atangji, government telemtetbatem tangatetba agi masü tetsübu nung agir, mapa ajak tsübuseta inyaker, anungji tetsübu agi tebilemba ajak mejembitetter. Ibayongji, tilar, sensaker aser tashiyim mamshitettertembo tetsübu agi peisasa tongpoka metugutet nisung aika teboka mesüngtet timtemdagi. Iba ama tetsübu maliba Nagaland tasenba ka yakta asenoki angutsü teimla tasen ka angh-i agütsüogo. Atangji, Nagaland ya yamai dangbo malitsüla. Inyakyim ajak nung ochi alitsüla aser senso shia dak Nagaland meimba shisatsü alitsüla. Iba mangdangji shitak ataloka aotsü atema Nagaland tasenba nungji Naga nungertema taküm tasen melenshir tenzüktsüla. Nagalandbo tasen saka Naga nungerbo kasa tejen nisungtem aser kasa tejen shisatsü adenertem dang süra chipo dang tasen ashi, soruchiokerbo tejen asütsü. Aon majungbaji chipo majungba agi masü saka sorcuchioker majungba agi majunger, anungji Nagaland jungdi süra Naga nunger yimsüsürtemi anir nütsüng nübortem ajak tasen küma melenshitsü tim. Iba Nagaland tassenba nungjibo sen aser tashiyim mamshii yimsüsürtem shimtettsüla. Iba Nagaland tasenba nungjibo sen yong government mapa mayoktsüla aser malitsüla. Iba Nagaland tasenba nungjibo government mapatem nung commission agiba sobaliba malitsüla.. Iba Nagaland tasenba nungjibo proxy tesayurtem malitsü aser tiyazü ita sen yanglur magitsü. Iba Nagaland tasenba nungjibo yimtsüng aser town ajak nung terenlok sentong tapet tulu bener arua shitak inyaktsü. Idangjibo government kaketrejutem nung angati shisaliok tajung raktepa angazüktsü. Nagaland tasenba nungjibo government mozü kitem ajak teronem menema yangertettsü aser angati taneptsü angutsü. Iba Nagaland tasenba nungji Naga nungertemi yanglutetba “Nagaland made’ agi alima asüngtsü. Iba Nagaland tasenba nungjibo auyi mapungtsü aser ozüng alema saru sarur malinungji, Public Action Committee menüngdaktsü. Nagaland anghba nükla nung anguba Naglandji asangsang nung asenoki yaktasa angutsüsa sarasadema atadi.