Naga nunger nem Tsüngremi sempet agüja lir: Tongpang

Kohima, Luchii/December 01, 2019 (TYO): NER Agri Expo Site, 4th Mile Dimapur nung Hornbill Music Festival 2019 sentong lapokba mapang Housing & Mechanical Minister, Tongpang Ozukum-i, music sabang tsütsü alima atsüa arutsüsa Naga nunger nem Tsüngremi sempet balaka agüja lir aser music sempet agi moaja lir, ta ashi.
Music tsütsü alimai jangjatsüsa/metettsüsa Naga nunger dak sempet/tashi lir, ta tuteta jembiba mapang Tongpang-i, Naga nungeri music ya jangrabangraba ka ama masü saka metsüngareta agitsüla, ta ashi.
“Naga nunger dak music sempet aliba ajiteta/asadangteta Nagaland sorkari Music Task Force tenzükja liasü, tang koba Task Force for Music and Arts (TAFMA) agi melenogo,” ta pai ashi aser music ajanga pei poksüng atema inyaktetsüsa PDA sorkari music ajungkettsütsü merangdar, ta shisem.
TAFMA mapatong ajanga Naga nunger musician tem ajungshitsü asoshi Nagaland Sorkari nüngdakba teyari ajak agütsütsü, ta Tongpang-i metetdaktsü.
Naga nunger aser alima tesem balala nungi musician tem pei sempet sayutettsüsa parnok nem sabang agütsütsü atema Hornbill Music Festival ayongzüktsüba asoshi TAFMA aser Live Now Events naprongla dang Tongpang-i pelaba metetdakja liasü.
Hornbill Music Festival sentong lapokba aonung Asin Shurhozelie, Tokaholi Chishi, Tali Angh, Ayim aser Divine Connection nungeri shilem agiogo.