Benjungtem madak benjung tenzükogo

Dimapur, December 1 (TYO): Tanü Heritage Village, Kisama nung Nagaland Governor R. N Ravi-i Nagaland nung 20 buba Hornbill festival tenzüktsüogo.
Nagaland Governor aser Hornbill Festival 2019 indang Chief Host R.N. Ravi-i tanü o jembidang Naga lennirtem nem tetushi agütsü.
Taoba lennirtemi mapang tamajung nung nübortem asoshi Nagaland State den special status ngutet aser iba atema tenüngsang agütsür. Naga nungeri item lennirtem kodanga mamatsüla, ta Ravi-i ashi.
Paisa Naga kintem indang sobaliba takar asoshi tenüngsang agütsü aser taoba mapang yimsüsür kari Naga putiotsü tim mesüi yanglushiba metongshitsü nüngdak, ta paisa shisem.
Nagaland atema anogo tasen ka arudar aser prangpong o ochimashi maliba Nagaland tasen ka yangerba nung nübor ajaki yariteptsü ayongzüker, ta R.N Ravi-isa metetdaktsü.
Tanü Governor R.N Ravi aser Nagaland Chief Minister Neiphu Rio nati tsüngtsüng tema benjungmong tenzüktsü.
Iba sentong nung Aniashu Village Chief, Montei-i sobaliba temoatsü meshi aser Naga kin balalai Colors of Nagaland nung shilem agi.
Sentong nungsa State Chaplain, Rev. Kuzierang Thou-i temoatsü meshia sarasadem aser Tourism, Art & Culture Advisor Khehovi Yepthomi-i tenüngsang agütsü.
Tanü mezüng anogo nung nisung 45142-i Naga Heritage village semdang aser parnok rongnung foreign tourist 407 aser domestic tourist 4954 liasü.