NESO-i NE state ajak nung ILP, NRC mapa inyaktsü akhanger

New Delhi, December 1 (Agencies): North East Students’ Organisation (NESO)-i Citizenship (Amendment) Bill, 2019 anema noktakba nungi masetshii Home Minister Amit Shah dang NE state tem nung lisopurtem kümzüka ayutsü atema takhangba onük pezü agütsüogo.
NESO-i Home Minister dang northeast state tem nung aliba lisopur sensotem taginüba akhümtsübua Citizenship Act yanglushitsüba mapa meinyaktsü atema ayongzükogo.
NESO-i onük pezü akhangba nung; northeast state ajak nung Inner Line Permit (ILP) system tenzüktsü, Indo-Nepal Treaty of Friendship, 1950 kübok northeastern region medendaktsütsü, northeast state tem nung base year balala nung ajemdaker National Register of Citizens (NRC) yanglutsü aser temzüng ajanga lisopurtem nem ali aser ali rongsen balala atema temeten agütsütsü dena lir.
Honibarnü Amit Shah den Citizenship (Amendment) Bill, 2019 atema senden ka amendang item onük benoka jembi, ta NESO chairman Samuel Jyrwa-i osangbener dang ashi.
“Citizenship (Amendment) Bill ya northeast nung lisopurtem anema lir. Northeast nung lisopurtem ya ajak nung telok tilaba lir ta sorkari angatettsüla” ta paisa ashi.
“CAB ajanga Assam Accord of 1985 mali kümdaktsütsü kechiyong iba nung cut-off date ji 1971 küm ta lateta lir. CAB ajanga bendangertem northeast-i arua aliba khuret tuluba akümtsü aser tatem nung lisopurtem pei lima nung telok tilaba akümtsü” ta Samuel Jyrwa-isa ashi.
2011 census ajanga Meghalaya nung nütsüng renlokbaji 27.8% liasü ta bushiteta lir. Iba ya nütsüng kanga renlokba lir aser iba ya Bangladesh nungi nisungtem aruba ajanga liasü ta sorkari angatettsüla, ta paisa shisem.