KTABA nung Advent Christmas mungogo

Dimapur, Luchii/Dec. 02 (TYO): “Christmas and the present world” omen nung ajemdaker December 1, 2019 anogo Kiphire Town Ao Baptist Arogo (KTABA) nung Khristmas yongya sentong ka agiogo, kong Helen Jamir, Principal ZPC tongti o jembir liasü.
Helen-i iba sentong nung jembiba mapang ashiba agi, “Yisu asoba mapang alima nung temenen jabujari agi sünger liasü aser nisung meimchi tang amai ani mesüngzükteti liasü.”
Mika 5:2 nung ajemdaker jembiba mapang, akhi mapang nungi Yisu asotsü aser aser pa kanga tepetzük tia nung aliba kibong aser nisungi memetetdak asotsü ta shinzüka liasü, ta lai ashi. Tsüngremi sensaker rongnung tesensaktiba, tepetzük tia nung alirtem rongnung tepetzüktiba aser temürektiba aser tasüngtet Mary ya aser kümzüksang Yisu Khrista tetsü asoshi shimtet, kong takar, tamarener aser tebur tajung tetsürtem Yisu tetsü asütsü imla liasü. Saka Tsüngremi nisung meimchir nük dang tesüngmangtsü maketba ka shimtet.
Iba sentong nung o jembiri Mary asoba, la taküm aliba aser la sür kotaki aoba indang tejangja ashi. Yamaji lai arogopur dang Yisu asoba benjong nung kija mulungjang shia pa sodaktsütsü asoshi ajemalua, asüngteta aser tamang kaa atati, ta ajungshi.
Iba sentong lenir ya Limasenla Longkumer liasü aser OC Kiphire, Bendangsangba Jamir-i tajungshi o jembi aser lanurtemia shilem balala ajanga nüburtem temoatsü ngudaktsü.