Assam CM-i anir BJP lennirtem Dibrugarh University telungi maitdaktsütsü

Dibrugarh, December 2 (Agencies): Dibrugarh University Post Graduate Students’ Union (DBPGSU)-i CAB anema noktakba sayua Assam Chief Minister Sarbananda Sonowal aser tanga BJP lennirtem campus telungi maitdaktsü.
DBPGSU züngsemtem aser pusemertemi Dibrugarh nungsa Citizenship (Amendment) Bill (CAB) anema cycle rally ka ayonga agi.
CM Sarbananda Sonowal aser tanga BJP lennirtem Dibrugarh University (DU) telungi maitdaktsütsü, ta DBPGSU general secretary Rahul Chetri-i osangbener dang ashi.
“Onoki CM Sonowal, Jorhat MP Tapan Gogoi, Rajya Sabha MP Kamakhya Prasad Tasa, Himanta Biswa Sarma, Atul Bora aser tanga BJP MLA tem campus telungi maittsü tenokdangba agütsüogo. Parnoki Assam nunger ashioktsüogo” ta Chetri-i ashi.
“CAB ya Assam nunger anema lir saka BJP sorkari iba bill pusemer” ta paisa shisem.
Mongulbarnü AASU lennirtemi New Delhi nung union home minister Amit Shah den ajuruteptsü aser CAB magizükba osang metetdaktsütsü.
“Assam nung kaketshir ajak longjemer CAB anema ola adoktsü mepishir. Iba Bill ya agizükra Assam nungertemi khuret tulu ajurutsü” ta Chetri-isa ashi.