GPRN MIP-i Nagalim Calendar atema jangjatsür

Dimapur, December 2 (TYO): Naga nüjiso atema rara nung shingaia Naga nüjiso atema inyaktsü tenzüksang Haipou Jadonang indang tenüng magientettsü, ta Government of the People’s Republic of Nagalim (GPRN)-i metetdaktsü.
Jadonang-i British nunger anema Naga nunger indang yimten maitsü nung ammeter noktakba atema Naga nunger nüma atanger. Pai bendanga agütsüba ajanga alima dang Naga nungeri pei putiotsü otsü aser yimten temetentem kümzüka ayutsü renema lir ta sayu, ta MIP sangdong ka nung ashi.
Nagalim Calendar 2020 ya MIP ajanga adok saka iba nung Haipou Jadonang tenüng mamshibaji Naga yimten atema inyakba mapa nungi pa tenüng agienerba masü, ta MIP-isa ashi.
Calendar nung keta alibatemji Naga putiotsü nung tatalokba agütsüba masü saka Indo-Naga yimten olemtep agiyonga aruba osang tatsüka lemsatepba dang lir. Taruba Nagalim Calendar nung MIP-i Haipou Jadonang dena adoktsü, ta parnokisa shisem.