Mkg nung 2nd Christmas Night Carnival Dec 16-19 akatsü

Mokokchung, December 04 (TYO): Mokokchung Municipal Council (MMC) teyari aser akhüm nung Adventure and Motorsports Association Mokokchung (AMAM)-i ayonga tanabuba “Christmas Night Carnival 2019” sentong tan Dec ita 16 nungi 19 anogo pezü nü akatsü lemtetogo, ta Mokokchung ADC & MMC Administrator, W. Manpai Phom-i osangbener senden ka pa taktang nung amendang metetdaktsüogo.
‘Christmas Night Carnival 2019’ sentong ya Mokokchung Police Point (City Square) nungi Rotary Club Building lenjem tashi nung akatsü. Iba sentong ya aonung 6:00 ako nungi tenzüka 9:00 ako tashi alitsü. Iba mapang chiyungtsü aser osettsüset tapu balala ayokba (Pop Up Shops) dokantem lapoktsü, ken tena kazüdak music corner amala, live band aser ano tapu aika alitsü, ta tayongertemi metetdaktsü.
Iba carnival ya tongtibangsa Christmas benjung melemdaktsüba dang masü saka nüburtem nem yokshiyokratsü atema maongka agütsüba den lanurtem ajungshia pei sempet sayutsü sabang lapoktsür, iba den külemi benjung mapang nüburtem tangu satoka aser pelatepa kazüteptsü nükjidong yur ayonger, ta parnokisa ashi. Kari danga iba mapang stall lapoktsü jangra lira, Imlong Place kübok aliba Bio Medical dokan nungi senpak 100/- agütsür form agizüktsü akok, ta parnokisa shisem.
Iba den külemi Mokokchung nung küm shia agia aruba ‘Cake Race’ sentong taküma Dec 24, 2019 nü anepdang 7:00 ako nungi tenzüka akatsü aser iba asemtepba nung ya MMC kübok aliba ward 18-i shilem agitsü. Takoker ward nem senpet cake sa agütsüba agi ‘Cake Race’ ta jatet. Iba sentong ya taküm agi 48 buba agir. Iba tetoktepba nung ward shia nisung 10 (tetsür 2 aser tebur 8)-i relay race yimya nung shilem agitsü.
Jangratemtsü kaji; taoba mapang ama taküma 2020 küm tasen agizükba ‘Mid Night Service’ sentongji Dec 31 aonung 9:00 ako nungi agitsü. Takümji sentong balaka renema lir, anungji, “mapang nung dang süngmangdaktsütsü”, ta tayongertemi metetdaktsü. Angazükba agi, iba sentong nung Mokokchung nung kentener tajungtemi dang masü saka tangalen nungia kentener tajung kar arua shilem agitsü imlar. Iba sentong ya jangratemtsüka agir asünung, Mokokchung alirtem dang masü saka tangalen nungi dena tereprangisa arur.
Item sentong balala agidang Mokokchung nung traffic tetuyuba balaka alitsü aser ibaji mapangtong nung osang agütsütsü, iba den külemi item sentong nung plastic khenyongi mamshitsü, arem shiruru kecha meyokdaktsütsü, firecracker kecha mepokdaktsütsü aser temesepba chiyungtsü khenyongi mamshidaktsütsü, ta Mokokchung ADC & MMC Administrator-isa tekümdangtsü kar lemsatepa liasü.