Sorkari JAF dang lungkak aitba anentsü tuyur

Dimapur, December 4 (TYO): Joint Association Forum (NDMA, ANDMSA,TNAI & PSAN)-i akhangba onüktem sorkari jungjunga reprangdangogo saka parnoki akhangba onüktemji magizükteter, ta Chief Secretary, Temjen Toy IAS-i ashi.
State sorkari Nagaland Services (Revision of Pay) Rules, 2017 atema dang Pay Anomalies Committee ka tenteta lir aser Pay Anomalies Committee-i agütsüba osang nung ashiba ama Revision of Pay Rules nung metokmeperi kecha mali, ta Chief Secretary-i ashi.
Revision of Pay Rules of 1984 aser 1993 ajanga sorkar mapa inyaker teshimtet telok ka nem pay-scales temelaba agütsü aser ibaji Pay Anomalies Committee-ia junger ta shiogo, ta paisa ashi.
Pay Anomalies Committee-i itasen tutsütsü atema shidangertem aser taoba ROPS mapang pay scales nung mekongshirtem ROP Rules, 2017 nung tagütsütsü ajak shitak agütsüogo. Anungji, Pay Anomalies Committee-i shidangbaji magizüker, ta Temjen Toy-isa metetdaktsü.
Telok ajaki pei pei indang khurettem timi aser ozüngi melaba yimya agi ashitsü temeten lir, saka tang JAF-i anir mapa inyaker kari lungkak aitba ya sorkari magizüker, ta paisa shisem.
Sorkari aremzüka ataba aser taochi sayuba nung sorkar mapa inyaker kari maongka ka ama agitsü meranger. Ajisüaka, JAF-i meshisadangi aser kuli melii onüktem akhanba magizüker aser sorkari parnok nem temerenshi agütsütsüsa akümtsü, ta Nagaland Chief Secretary-isa ashi.
Lanur aika zünger mapa mangu lir aser parnoki tang sorkar nung mapa shitak meinyakba nisungtem dang nungi kanga agi tajungba inyaktsü, ta Temjen Toy-isa metetdaktsü.
Külen, Directorate aser district ajak dangi Office Memorandum ka yokogo aser iba nung ketdangsertemi mapai maruba nisungtem indang osang Secretary P&AR nem agütsütsü tetuyuba agüja lir.
Ano, state sorkari tanga sangdong ka nung JAF dang lungkak aitba anentsü aser mapa inyaktsü mesüra ozüngi tapet agi merenshitsü ta metetdaktsüogo.