Dr.Easterine Kire-i Dr.Chandran Devanesan Endowment Lecture agütsü

Dimapur, Luchii/December 5 (TYO): Naga nunger rongnungi award ngur aliba sangro mejemer aser kaket zülur Dr.Easterine Kire-i December 4 nü Madras Christian College, Chennai nung tasembuba Dr.Chandran Devanesan Endowment Lecture agütsüogo. Iba sentong ya Department of History-i ayongzüka agi aser lai ” unwritten history, a people’s story unveiled” nung ajemdaker jembi.
Dr.Chandran Devanesan ya Madras Christian College (MCC) indang mezüngbuba India nunger principal liasü. MCC ya Chennai nung amendaker aliba arts aser sciences college ka lir aser India nung temaba jenjang nung aliba college tem rongnung teti züngoksema alir aser India nung college tem rongnung tajungtiba ka ta züngshir. MCC ya 1837 küm ngutet aser Asia nung extant colleges tejentiba rongnung ka lir. Kasa mapang nung Dr.Chandran Devanesan ya mezüngbuba North East Hill University, Shillong Vice Chancellor liasü.
O jembiba mapang Dr.Easterine Kire-i Nagaland nung World War II mapang mangaoka maliba British aser Japan nunger sepaitem indang otsü kar ashi. Laisa, Naga hills nung tayimtsü khazüka yokba sülen Indian Air Force officer kati koda Naga nunger nüjiso bushirtemi pa kanga junga anepaluba ajangshi, iba indang otsü dena ashi. Ajisüaka küm tem tsüngda bendangertemi Naga nungertem jenjang tamajung ka nung toktsüba indang sasa bilemba lemsatep. Laisa, nüburtem dang Northeast India kechia tetsübu makai semdanga iba tesem nung nüburtemi bendanger koda junga agizüka anepalur iba ji ajangshitsü merangdangtsü asoshi ajungshi. O jembi tembanga lai Naga nunger sobaliba ken ka aten.
Iba sentong nung kaketshir aser tesayurtem noklang aika aden. Head of Department of History Prof.Dr.Surendran purushotham, Dr. Chandran Devanesan’er jabaso Dr. Dayalan devanesan aser NCF Chennai Pastor Wapangtoshi shiba North East India Welfare Association Chennai tir lir parnoka iba sentong nung aden. Iba sentong ya Marilyn Gracey Augustine lenisüba kübok agi.