Tongdentsüyong Ward kümteter küm 25 jungogo

Mokokchung, Dec 5 (TYO): Mokokchung Municipal Council kübok aliba Tongdentsüyong Ward kümteter küm 25 ajungba Jubilee sentong “Jungtepshidi” omen nung ajemdaker Dec 5 nü parnok Community Hall nung takok ngua mungogo.
Iba sentong nung tetushi tesemdanger, Nagaland Housing and Mechanical Minister, Wb. Tongpang Ozükümi jembidang, bendanger kin balala den Aor yim balala longjema aliba ward rongnung Tongdentsüyong ya tatishitsü tajung sayua litetba ward ka asütsü aser yangi alirtem ya telongjem nung aliba dang masü saka maparen aika nung meranga inyakba ward ka lir, ta tenüngsanga ashi.
Ward ka tejakleni renloka aotsübaji nütsüng nübu ajaki khuret süa bilem nung dang otettsü, ibaji alima osettsüset aser shi temang renlokba nung dang masü saka shisatsü, libaliro aser yimya awashi ajak nung alima den liromedema renloktsübaji kanga nungdaker, ta pai ashi.
Ward nung alirtem ya yim balala nungi adenshia liteper asünung, yangi nüburtemi shimtetba ward yimdeni nütsüng nübur tiptema aser junga lia aotsü atema koba temzüngozüngsa latetdir item ajak nungji senso tajung ka ama tashi angaa anitaktsü asoshi paisa ajungshia liasü.
Paisa lanurtem dang olen ka lemsatepdang, “nenok koba wadang nung südir süaka aser kechi inyakdir inyakaka, item ajak nungji takok tajung angutsü merangang” ta ashi. “Tamajung nung tetoktep saka temeim nung mapa tajung inyaktsü merangang”, ta paisa ayongzük.
America nungeri Tsüngrem tama südaktsür mapa ajak inyakba ama, “iba jubilee nung bangzüng kechisa renemdir, itemji Tsüngrem tenüng nung azüngashia renema yura Pai memoatsüiang malitsü”, ta paisa tatalokba kuli kar bener arua lemsatep. “Küm 25 tashi arudang mepelatep kar danga lira, jubilee amungba tenüng nung tatok agütsüteptsüla, yamaji kodang inyakdir, jubilee amungba temoatsüji aji asütsü”, ta paisa ayongzük.
Tetushi tesemdangerisa Tongdentsüyong Ward pur jubilee amungba nüngtem yangluba nüngshilung den nüngo kaket adoktsü aliba ka sayatsü. Mokokchung Additional S.P, Wb. Imtimereni “Jungtepshidi” omen nung ajemdaker tagitsü onük aika bener arua tesentepertem ayongzük. Tongdentsüyong ward pur jubilee amungba tenüng nung teinyaktsü bangzüng kar renema yuogo.
Tanep Mokokchung Town Baptist Arogo Assoc. Pastor, Wb. P. Toshi den temoatsü meshia sarasademer sentong tenzük. Sentong nung Mokokchung D.C Wb. Limawabang Jamir, Ao Senden tir Wb. Chubawati, Mokokchung Village Council Chairman Wb. Imonungba, All Ward Union Mokokchung Town tir Wb. R. Ayim, Tongdentsüyong Ward Chairman Wb. N. Lipokmar Jamir, Mezüng Tongdentsüyong Ward Chairman tsürabur Wb. Temjentemsü aser ano tangartemia shilem agia liasü.