Parliament nung CAB agizükra SC nung ken o benoktsü: KMSS

Guwahati, December 05 (Agencies): Krishak Mukti Sangram Samiti (KMSS)-i, Parliament nung Citizenship Amendment Bill (CAB) agizükra parnoki Supreme Court nung ken o benoktsü, ta metetdaktsü.
“CAB agizükra KMSS-i Supreme Court dang temzüng alema inyakba bill ya agienang ta mepishitsü. Iba ya tamangba yimsü tsütsü telemsa adokdaktsütsü ozüng ka lir aser linük temzüng alema lir, koba ajanga secular tangatetba alema inyaker,” ta KMSS adviser, Akhil Gogoi-i Guwahati nung osangbenertem nem metetdaktsü.
Paisa, tangatetba balala liaka iba bill anemabo KMSS-i All Assam Students’ Union (Aasu) den longjemtsü melunga lir, ta ashi. “Assam nungeri iba anema rara nung takok ngunüra tanga lenmang mali saka ajaki longjemer raratsüla,” ta paisa shisem.