Nagaland nungi lenirtemi CAB atema obang ka ser jembi

Kohima, Luchii/December 05 (TYO): December 3, 2019 nü Assam House, New Delhi nung Union Home Minister, Amit Shah ajurua jembir Nagaland nungi teshimtet züngsemtemi CAB onük nung obang ka ser jembiogo, ta Brihostibarnü NPCC Tir, K. Therie-i sangdong ka ajanga metetdaktsü.
“CAB (Citizenship Amendment Bill) atema Union Home Minister ajurur Nagaland nungi delegates ji NNDP, BJP, NPF, Congress, ANGBA, NTC, ENPO aser NSF nungi liasü. Union Home Minister majurudang onok Nagaland House nung mezüng adenshi aser 6th CAB nung Nagaland bo medendaktsütsü atema mepishitsü asoshi onok ajaki bangjema liasü. Congress party dak alaka state Chief Minister Neiphiu Rio aser Opposition Lenir T.R. Zeliang na densema ajaki CAB nung state medendaktsütsü atema jembi,” ta kasa sangdong nung shia lir.
“Chairman NEDA aser Minister Hemanta Biswa Sarma leniba nung iba senden mena liasü. Chief Minister-i jembiba sülen pai, NRC (National Register of Citizens) densema CAB ji linük tesem ajaklen benoka inyaktsü, ta metetdaktsü. Nagaland nungbo ILP aser format nung aliba tanga qualifications nung ajemdaker ang citizenship agütsütsü ta paisa ashi. Paisa senso temeden agütsütsü atema ILP number nüngdaktsü. Format nung column ka agütsütsü aser iba nungji applicant-i ILP number agütsütsü nüngdak,” ta sangdong nung shia lir.
Iba sülen Theja Therie-i, ILP ya anogo 15 nü atema agütsüba temelaba ka dang lir, anungji iba nungji number mali, ta ashi.
Iba dak sendakba nung Chairman NEDA-i, “Ner sorkari number yanglutsüla,” ta ashi aser iba telemtetbaj Chief Minister-i pelaa agizük.
“Maneni rasa-a ashitsü atema T.R. Zeliang-i mapang meshi saka Union Home Minister-i mangai, iba nung ya yimtenren taitdaktsü ta ashi. O jembitsü atema TR nem temelaba magütsü. Home Minister-i Hindi agi dang jembibaji süngmanger. Nagaland nungi lenirtemi akhangbaji pai (Amit Shah) angateter asü mangatetar ni mejangjar,” ta Therie-i metetdaktsü.
Oda osang tajung kaji, Union Home Minister aser Chairman NEDA napronglai maneni o lemteptsü atema draft Bill ji Nagaland nem agütsütsü ta shiogo, ta Therie-i metetdaktsü.
“Congress Party-ibo iba senden nung o mejembi, kechiyong mezüng nungi onoki CAB nung Nagaland medendaktsütsü atema akhanger,” ta NPCC Tirisa metetdaktsü.