Hornbill benjung nung kin 17-i sobaliba shilem balala agi

Kohima, Luchii/December 05, 2019: Brihostibarnü Kisama nung Hornbill Festival nung Aoer sobaliba telok kati alurudang mo anetba aser tsüksü ainba sayudang tangokba noksa nung angur.

Kohima, Luchii/December 05 (TYO): Brihostibarnü Kisama nung Hornbill Festival anogo 5 nübuba nung kin 17 nungi sobaliba teloktemi shilem balala agia lokti jangratemdaktsüogo, ta ketdangsertem osang ka ajanga metetdaktsü.
Brihostibarnep cultural extravaganza sentong nung tetushi tejaokertemji ponguben tashi Indian National Rally Champion aser 2000 Asia Zone Rally Champion, Hari Singh, Major General IG AR (North) P.C. Nair aser IPS Special DG CRPF, Arun Kumar Sharma nunger liasü aser nikongdang sobaliba sentong nung tetushi tejaokerji Marketing Director, JK Tyre & Ind Ltd., Vikram Malhotra liasü.
Tichipami yim nungi Sumi nunger sobaliba teloki ‘Aghixu Chine Eno Ghixu Ghili’ ta ser tzülu nung mo atemba yimya sayu, Kuki sobaliba teloki ‘Shuta Lam’ ta ser yar tsüngsang aser Zeliang nunger Mount N-Gaulo teloki ‘Tekie’ ta ser jangzü apua shilem agi.
Pochury sobaliba teloki ‘Putsa Khi, Zhutsa Khi’ ta ser sobaliba ken ka aten, Aoer sobaliba teloki ‘Mo Anetba’ saya aser Sangtam nunger sobaliba teloki ‘Singthsalu Kyamülitaba’ ta ser lasang akhaba saisapong sayu.
Maneni Yimchungrü nunger sobaliba teloki menjang aruba mapang atenba ken ‘Oh Lo Ha Lo’ aten, Rengma nunger sobaliba teloki ‘Ngada Khwe’ ta ser ken ka aten aser Kachari nunger sobaliba teloki ‘Daosri Delai’ ta asüba yar tsüngsang.
Chang nunger sobaliba teloki ‘Kong- Kiepu’ ta ser sobaliba ken ka aten, Lotha nunger sobaliba teloki sobaliba yimya nung aneptsüba ‘Montsai’ ta asüba jilushi ai aser Phom nunger sobaliba teloki ‘Mai Asho’ ken tena tsüngsang.
Maneni Khonoma yimdak nungi Angami nunger sobaliba teloki ‘Khuthuokeva’ ta asüba sobaliba saisapong mezüng-tsüktep sayu, Konyak nunger Mopong Hongkong Yalam teloki akhi lisopur yimya nung tzü atadang atenba ken ka aten aser Khiamniungan nunger sobaliba teloki sobaliba yimya nung kiyimba ‘Paosopo Hiyam’ sayaa liasü.
Chakhesang nunger sobaliba teloki ‘Hetiti lizo’ ta ser ken ka aten; iba ken ya ‘cuckoo’ ozü nem tenloktsüba ken ka lir. Darogapathar village nungi Garo nungeri sobaliba saisapong ‘Wapang Kala’ sayua liasü.
December 10 nü tashi Kisama tongti tesem nung kin 17 nungi sobaliba telok balalai anogoshia sobaliba shilem balala agitsü.