Mkg nung ‘Bookipedia The Free Library’ ta sür kaketnang ka lapok

Mokokchung, Dec 9 (TYO): ‘Bookipedia The Free Library Mokokchung’ ta sür angati azüngba kaketnang (libarary) ka Dec 9 nü Dilong Ward nung aliba Mokokchung Town Hall tejenba anasa Urban Hub Cafe nung tenzükogo.
Mokokchung D.C Wb. Limawabang Jamiri iba angati kaketnang lapokja jembidang, Bookipedia teloki kanga junga shisateta iba ama mapa tajung inyakba asoshi par telok dang pelaba den iba mapatong yagi tarutsü lanurtem kaket azüngba aser züluba wadang nung tajangzük jenti angutsü imlar, ta ashi.
Lanur sempet jenti aketer aika lir saka tanü technology oset balala adokba ajanga lanurtem aikadi kaket mazünger, anungji, iba mapa yagi parnok sempet arangshitsü asoshi tongtibang tzüpokdak ka asütsü amanger, ta paisa shisem.
Bookipedia nung ya kaket 1500 dak tema lir. Item kakettemji; Naga nunger kaket zülur balalai züluba kaket densema India nunger aser bendangertemi züluba kaket tapu telemsa aika angutsü. Ao oshi nung züluba kakettema karbo angutsü. Imdangjem, sangro, süiren, Naga yimden, tar nunger otsü, pei taküm zülu, Christian, tamang yimsü, tajungshiba, sobaliba, loktiliba, kaketriju (academic), libajen (environment), puin (science), kaketkeno, politics aser ano kaket aika iba kaketjen nungji angutsü.
Tezüngnürtemi Library Card yanglua kaket angati apua amshitettsü aser Urban Hub Cafe jagi arua kaket zünga kazütettsü akok. Iba Bookipedia Library ya tongtibangsa tanü lanurtem jenti kaket azüngba yimya samadaktsür smartphone ajanga lenmang tezülen aoba ngua, parnok nem kaket azüngtsü ajungshitsü nükjidong yur tenzükba lir, ta Bookipedia telok nungi züngsem, EAC Sentilong Ozükümi metetdaktsü.
Iba kaketjen meshiteta Mokokchung Town Baptist Arogo (MTBA), Youth Evangelist, Monglier Tzüdiri sarasademtsü.