Peteneilhu Kulimbe-i Naga Chef-7 takok angu

Kisama nung December 09, 2019 Hombarnü Advisor to CM Abu Metha, Bhaichung Bhutia aser sentong achaayangertem külemi Naga Chef-7 tetoktepba nung takok angusang Peteneilhu Kulimbe (tiyong) den tetokteper ana tangokba noksa ka yangi angur.

Kohima, Luchii/December 09, 2019 (TYO): Hornbill Festival sentong shilem ama Nagaland sorkari pusema aser Synergy Group Enterprise-i achaayangba Naga Chef Season-7 sentong nung Peren District nungi arishi küm 35 tain Peteneilhu Kulimbe-i takok ngua liasü, ta sangdong ka ajanga metetdaktsü.
Sempet agütsüba sentong nung Nagaland CM, Advisor, Abu Metha-i jembiba mapang pai, Naga nunger chiyongtsütem ajanga asen sobaliba tajungtiba sayur asünung, CM Neiphiu Rio-i iba mapatong ajungkettsütsü asoshi jangra lir.
Tesüiba küm 7 tashi iba sentong takok ngua ayongzüktsüba aser Naga kin chiyongtsütem ajungkettsüba ajanga Abu-i SGE nem tenüngsang agüja liasü.
Pai ashiba agi, Hornbill festival sentong ajanga Nagaland nung kin balala ajak lungjemtsür.
Iba olen nung ajemdaker, Abu-i ashiba agi, tim mapaten inyaktsü asoshi Nagaland aser naga nunger atema tang mapang ya tetemjen lir. Iba sentong maneni takok ngua bener aotsü asoshi lanur nem sorkari maneni teyari agütsütsü, ta pai nangzük.
Naga Chef – 7 tetoktepba nung takok angusang Kulimbe nem Metha-i kuli kaket den senpet sen lakh 3 agüja liasü.
Director Tourism Department, Akhale Vizol-ia, tarutsü anogotem nung Naga cusines indang ambassador akümtsü asoshi sentong nung shilem agir ajak ajungshia liasü.
Team züngsem, Alezo Kense-i 2013 küm nungi tanü tashi iba sentong takok ngua agiyonga aruba aser Naga Chef mangdang/nükla indang lemsatepa liasü.
Naga Chef sentong atema, Mhachaki, Kohima nung Culinary Skills, Mystery Basket, Pressure Task, My Signature Dish, Just Desserts aser Group Round nung toktepdaktsüba sülen, taküm küm Screening round nungi Naga Cook 6 shima liasü. Naga Chef Season-7 atema finalists asemji – Hechuba Chang, Peteneilhu Kulimbe aser Chungmei Phom liasü aser December 1 nungi Naga Heritage Village, Kisama kübok ‘The Amphitheatre’ nung ayongzükba Entrepreneurial Round nung par asemprongla shilem agia liasü.
Maneni, sempet agütsüba sentong nung, taoba mapang Indian Football Team captain, Bhaichung Bhutia aser Information Technology & NRE, Advisor Mmhonlumo Kikon naprongla dena liasü.