Nagaland indang products alima ajungalen shishilembatsü

Dimapur, December 9 (TYO): December 9, 2019 nü Kisama nung sobaliba sentong agidang Tribal Cooperative Marketing Development Federation of India Ltd (TRIFED) Ministry of Tribal Affairs Managing Director Pravir Krishna, IAS aser pa kinungtsü den Regional Manager of TRIFED A.D. Mishra nungertemi aden.
Sentong nung Pravir Krishna, IAS-i o jembidang “benjungtem rongnung benjungtiba nung adenba atema pelar aser Nagaland indang ken, tsüngsang, sobaliba aser yimya balala kanga jangratema repranger” ta ashi.
Linük aser alima tesem balala nung Nagaland nung yanglutetba osettem aser chiyungtem belenshitsü atema TRIFED-i yaritepnür, ta paisa ashi.
TRIFED aser DUDA tsüngda tenangzüktep ka agiogo aser iba ajanga onoki tesem balala nung Nagaland nungi adokba oset aser chiyungtsütem belenshitsü, ta Khrisna-isa shisem.
Van Dhan scheme indang olen ka jembidang “arem-min nung anguba rongsenji arem-min nung alirtem nem agütsütsüla ta TRIFED-i bilemer. Lisopur SHG 300 shi ka nem training agütsügo aser shishilembatsü atema senotsü teyaria agütsüogo” ta paisa metetdaktsü.
Van Dhan ajanga Nagaland nung self help groups 100 shi adokdaktsünür. Nagaland nung aluyimertem, teka mapa inyakertemi jenjang tajungtiba agi yoktettsü, ta Khrisna-isa ashi.
Iba sentong nung Tourism Advisor H Khehovi Yepthomi-i tetushi süa jaokertem nem nü aser korang sempet agütsü. Iba sentong nung Department of Underdeveloped Areas Advisor Bongkhao Konyak-i Host ama shilem agi.
Tanü Lotha cultural troupe-i sobaliba sentong lapok aser parnoki ‘Ritsso Shari’ ta ser tsüngsang ka ai. Parnok sülen Yimchungru cultural troupe ‘Milakpha’ (fire making) sayu aser Sumi cultural troupe-i ‘Aphilo Kuwo’ tsüngsang.
Maneni, Garo cultural troupe-i ‘Jaktong Sika’ ta ser sobaliba saisapong ka asaya, Angami cultural troupe-i Rutherie ta ser shilem ka agi, Khiamniungan cultural troupe-i ‘Hokha Jehang’ ken aten aser Konyak cultural troupe-i ang ainba sayu.