Chiyongba ajanga kulisüba

Asenok ama shirurutem den kecha tepila mali lia aliba tia nungi nüchi kümdaktsüba dang masü saka tanüla tekümtet agütsüba Tsüngrem temeimji onsara tulu lir. Iba Tsüngrem temeim indang yabo shinga danga teshi aser kuli tesü ta ashiyonga kuli masübo maremtsüsa nisung mulungjang peladaktsür aser ajemajema melitetter. Ibayongji, Tsüngrem temeim agi kümzükba purtem aikati pei taküm aser rongsen tenla tulu agüja alima balala nung Tsüngrem temeim indang kuli asür. Aji oda, Tsüngrem temeim indang kuli asüba mapatem ya inyakyim balala ajanga inyaker. Kari Tsüngrem temeim indang nisungtem den jembia senzür, kari zülur alemer, kari ken ajanga kuli asür aser kari shi temang aneptsüba temeim mapatem ajanga Tsüngrem kuli asür. Item Tsüngrem temeim kulisertem jagi alima tesem aika nung nisungtem nem Tsüngrem temeim angatetdaktsüba ajanga parnok mulung meyipa tamanger akümer. Item ama, Tsüngrem temeim kulisüba inyakyim rongnung mamangba purtem dang Tsüngrem temeim indang ashitsübaji tang ama Khristmas benjong mapang ya külemi benjong chiyong chiyonga kuli asütsübaji mapang tajung ka asütsü. Yisu Khrista alima nung alidanga pai pa sülen anidakertem ajak nem chiyongdaktsüba otsü asenoki meteta lir. Ibaji dang masü saka Paiang temenen pur kidang parnok den külemi chiyongtsü renemdaktsüba tatalokbatem asenoki Laishiba nung azünger. Item tatalokbatem nungji asenok asoshi tangazüktsü aika lir. Asenokibo temenen nisung mesüra mamangba purtem den külemi chiyongtsüsa Khristmas sentong yangludi asünung, ashiko, nisung aikati memulungtsüa akok, kechiyong yangji nübo, rongsen aser mapang jenti endoktsüsa adoktsü. Atangji, asenok karibo asen lima nung meinyakyonga, tangalen asenok ‘misson’ lapoka alidak Khristmas ama anogo nungbo limapurtem jaoka külemi chiyongba otsüa angashiogo. Chiyongtsü ya asenok asoshi tebok asüngtsü asoshi dang masü saka temeim sayutsü, tembar yimteptsü, putepdaktsütsü aser pelateptsü asoshi lir. Aji oda, kodang nisungtem külemi chiyongdir, idangji memeteti tesendaktep tajungba yangluadoker aser tali putepdaktsür. Iba amaji chiyongtsü ajanga tangar den puteptsü merangba aser tangar dang temeim sayutsü merangba mapatemji, ” Food Ministry”, Chiyongba ajanga kulisüba mapa asütsü. Atangji, Khristmas mapang nung mamangba purtem den külemi chiyonga Khristmas indang jembitsübaji town-tem nung kanga tapet aser tajung asütsü. Iba amaji inyaknüyonga yimtak yimtsüngtem nungbo mamangertem mali, anungji benjong mapang Food Ministry ajanga Tsüngrem temeim indang mamangertem dang kuli südi süra tanglen oagi agitsüsa sentong yanglutsüsa adoktsü. Ajisüaka, town arogotem asoshibo pei arogo nung züngsemtem kija pelateptsü agibo, külem alir mamangertem jaoka benjong chiyonga Tsüngrem temeim indang jembira, Tsüngrem temeim kulisüba mapaji ajisa tajungba asütsü. Town tulu nungbo mamangertem nütsüng aika asütsüa akok, anungji kiyong aser mepu shia nung sentong balala adoka aginung kanga ajungtsü. Mamangertemji teimbaka tsümartem asütsü, anungji achiajem nung meputeptsüa akok, anungji asenoki dang parnok nem sen agütsür parnok nem soruchiokdaktsür külemi chiyongbajisa tajungba aser senotsüa kanga agi tajemba aotsü. Talibo küm aika asenok den alir saka asenoki parnok limapurtem dang kenüa Tsüngrem temiem indang shia mali. Amangtsübajibo Tsüngrem mapa aser nisung mulung saka asenok mapaji Tsüngrem temeim indang asen alidak nungi tenzüka alima tatem tashi shiyonga aotsübaji lir.