CAB ajanga India temzüng tanela raksatsür: Anand Sharma

New Delhi, Luchii/December 11 (Agencies): Bodhbarnü Congress Party lenir, Anand Sharma-i, Citizenship (Amendment) Bill ya ajanga linük temzüng tamendakdak raksatsür, ta aitsü.
Bodhbarnü Rajya Sabha nung Citizenship Amendment Bill onük nung o toktepba mapang Anand Sharma-i, “Nenoki benokba Bill ya ajanga India linük temzüng tamendakdak raksatsür. Iba ya ajanga Republic of India raksatsür. Iba ya ajanga India tanela raksatsür. Iba ya asen linük temzüng aser democracy anema lir. Iba ya ajanga telemsa adokdaktsür aser bendangshidanger,” ta ashi.
Pai ashiba agi, anüdoklen aser anüolen Pakistan nungi nisung aika India-i aruogo aser parnok rongnung taoba mapang Ato kilonser ana- IK Gujral aser Manmohan Singh nata densema lir.
“Linük ana lemsaba sülen anüdoklen aser anüolen Pakistan nungi nisungtem arua tejenokdak magütsü asü? Parnok nem senso magütsü asü? Taoba mapang asen ato kilonser ana- Dr Manmohan Singh aser IK Gujral nata linük lemsaba sülen India-i aru,” ta Sharma-i ashi.
Veer Savarkar-i linük ana tangatetba prok, ta shia Sharma-i, CAB ya ajanga linük temzüng tendangba nung tamakok nguogo, ta ashi.
“Savarkar ya Hindu Mahasabha nung lenir ka liasü. Muhammad Ali Jinnah ya Muslim League nung lenir liasü. Linük ana tangatetba ya Congress-i masü saka Savarkar-i prok,” ta Congress lenirisa ashi.
“British nungeri kechi shilem agi? Parnoki Muslim League aser Jinnah nem tashi agütsü. World War II tenzükba mapang nung Congress nokdang aser ozüng alema tentetba tentet ka lir ta sangdong. Nisung meyirjang aika jail nung puok aser Gandhi-i ‘Quit India Movement’ tayongzükba agütsü,” ta paisa ashi.
CAB ya linük temzüng Preamble anema lir, ta shia Sharma-i BJP dang iba bill ajanga North-East nung longkak sashia aitbaji meyipa reprangshitsüla, ta ashi.
BJP maneni aija Sharma-i, tanü India nung mezüngbuba home minister, Sardar Patel-i Ato kilonser Narendra Modi ajuru asübo pai Modi dang kanga jashila, ta ashi.
“Asen tamangba yimsü nung asenoki tanaben asoba aser taintem ajuruba nung amanger. Anungji Sardar Patel-i Modi ajurura pai pa dang kanga jashila. Atangji Gandhi-ia jashitsü saka Patel bo kanga ain adoktsü,” ta paisa ashi.