CAB anemer azüoktsü atema Assam & Tripura nung Army lemzüktsü

Agartala/Guwahati, December 11 (Agencies): Rajya Sabha nung Citizenship Amendment Bill (CAB) benokba anogo Assam kübok tesem balala nung CAB anema lungkak ait aser iba jagi Guwahati nung curfew alitsü tetuyuba agütsüogo aser ano district 10 nung mobile internet services shibangogo.
Tripura nunga tensa mejungi akümba agi Army indang column ana mapa lemzüktsüogo aser Assam kübok Bongaigaon nung column ka renema lir.
Centre sorkarti sepai 5,000 tashi tayimtsü ajanga Northeast state balalai yokogo aser parnok rongnung Kashmir nungi sepai 2,000 shi dena lir. Army indang column ka nung nübo 70 shi lir.
“Bodbar nikongtsütsü 6.15 nungi tenzüker Guwahati nung curfew alitsü ozüng agütsüogo. Onoki mapang shia tensa asadangtsü aser iba sülen jiang curfew agientsü atema telemtetba agitsü” ta Assam Police Additional Director General (Law and Order) Mukesh Agrawal-i ashi.
North East Students’ Organisation (NESO)-i yashi northeast ajunga mokdangtsü ayongba sülen tanü Assam aser Tripura nung tensa mejungi aküm.
Tanü mokdangtsü kecha mayong saka Guwahati, Jorhat, Golaghat, Dibrugarh, Tinsukia, Sivasagar, Bongaigaon, Nagaon aser Sonitpur nung nisung aika adenshir lungkak ait aser parnoki lenmang nung tyre aser süng ronga noktak. Dibrugarh nungbo Army-i flag march senzü.
Olulu aser osang tiyazü belenshiba azüoktsü atema Assam kübok Lakhimpur, Dhemaji, Tinsukia, Dibrugarh, Charaideo, Sivasagar, Jorhat, Golaghat, Kamrup (Metro) aser Kamrup district tem nung mobile internet services shibangogo.
Tanü lungkak aitertemi Prime Minister Narendra Modi-i Japanese Prime Minister Shinzo Abe den senden amendang amshitsü atema yangluba sabang ka raksatsü.
“Sarbananda Sonowal-i aniba sorkari mapa tamajung inyaker. CAB magien tashi onoki raratsü” ta kaketshir kati ashi.
Lungkak aitba ajanga Northeast Frontier Railway-i train 14 tashi thiogo. Ano, Gauhati University aser Dibrugarh University nung December 16 tashi tatidang ajak thinenogo.
Tripura kübok Kamalpur, Manu, Ambassa, Teliamura aser Sipahijala nung lungkak aitertem aser police tsüngda rara adokba osang angazükogo, ta Additional DGP Rajiv Singh-i ashi.
“Police-i teinyaktsü shitak inyakogo. Army indang column ana Kanchanpur aser Manu tesemtemi yokogo” ta pai ashi.
Bodbarnü Tripura Congress-ia state party headquarters anasa lungkak aitdang police debn mangatettep adoka raratep.
Iba tatalokba anema Tripura Youth Congress-i Brihostibarnü ghonda 24 state ajunga mokdangtsü ayongzükogo.