Rajya Sabha nung Citizenship Bill agizükogo

New Delhi, December 11 (Agencies): Bodbar aonung Rajya Sabha nung Citizenship Amendment Bill (CAB) agizükogo.
Tanü CAB benokba sülen ghonda 8 tashi o atsütepa jembidang Opposition lennirtemi onük balala benok saka parnoki tamakok angu.
Rajya Sabha nung opposition MP temi CAB ya select committee ka dangi yoktsü atema onük ka benok saka sorkari ibaji magizük.
“CAB ajanga India nung permanent residency maliba nisung lakh aika nem teimla agütsür” ta Union Home Minister Amit Shah-i tanü bill benokdang ashi.
“Iba bill ajanga reshikangshi tia ajuruba kibongtem nem maongka ka agütsütsü. Linük nung nübortemi iba bill pusemogo” ta paisa ashi.
“Nai benokba bill yagi Indian constitution tamendakdak raksatsür. Iba ajanga Republic of India nung kongshir” ta Congress MP Anand Sharma-i ashi.
Külen, Congress lennir P Chidambaram-ia “ozüng amertemi iba bill magizüktsü imlar” ta ashi.
Rajya Sabha nung CAB atema olemtep metenzükdang Congress-i BJP aitsü. “BJP-i tamangba yimsü nung ajemdaker linük nung telemsa lidaktsünür” ta Congress-i tai tongloktsü.
“Assam aser Northeast ajungalen atalokba reprangang. Sorkari item tatalokbatem mangur” ta Singh-i ashi.
Züngsem 245 agi akümba Rajya Sabha nung halfway mark ji 121 lir, kechiyong tang menden pungu tazüng lir aser iba ajanga nübo 240 dang lir.
Taonung Rajya Sabha nung vote enoktsütepdang nisung 125-i pusema enoktsü aser 105-i anema enoktsü.
Lok Sabha nung BJP-i aniba NDA nübo teimba lir aser iba jagi Hombarnü o atsütepa sülen votes 334-106 ajanga agizüka liasü.