DDSC, Dimapur nung December Fest 2019 tenzükogo

Dimapur, Luchii/December 16 (TYO): December 16, 2019 nü DDSC, Dimapur nung December Fest 2019 tenzükba sentong agiogo, iba sentong nung alakteta jaokerji, ADC Dimapur V. Lovitoly Sema liasü, ta ketdangsertem osang ka ajanga metetdaktsü.
December Fest ya Better Dimapur Team-i Dimapur Municipal Council (DMC), Naga Council Dimapur, GB’s Union Dimapur, Dimapur Urban Council chairman Federation (DUCCF), Naga Women Hoho aser Dimapur Naga Students Union den senteper ayongzük.
Iba sentong nung jembidang Lovitoly-i, iba sentong ayongzüker team-i sempet sayutsü, shilem agitsü aser longjemer benjung mongpu amongtsü atema ajak nem sabang agütsüba atema parnok dang pelaba metetdaktsü.
Laisa lanur entrepreneurs aser sempet alir lanurtem dang pei sempet sayutsü atema iba maongka agitsü aser lokti rongsenkettsüng jenjang ajungkettsütsü atema ayongzük.
Item sentong aser tetoktepba balala nung shilem agitsüpurtem dang saisaponger ka dak aliba tanela nung shilem agitsü ayongzüka lai, “Iba ya takok anguba mesüra tamakok anguba indang masü saka ajak longjemer shilem agibaji tongtibangba,” ta ashi.
Iba sentong nung okila jembidang Administrator, DMC Albert Ezung-i, nüburtem nem shilem agidaktsütsü, tembar yimtettsü aser shisa lemsatepa tejakleni aotsü atema sabang agütsütsü asoshi December Fest ya ayongzük, ta metetdaktsü.
Sentong tetenzüklen Father’s House Church Pastor, Robert Kikon-i sarasadema liasü. Sentong nungsa milen tsüklokba aser tenangzükba agi, Maple Tree School nungi (choir competition nung takok angur, December Fest 2018) tanurtemi ken ka aten aser Star Excelence Kindergarten-ia shilem balaka agia liasü. Iba sentong ya Bobita Rai leniba nung agi.
Iba Fest tembangba sentongji December 17 nikongdang 5:00 ako nung DDSC Dimapur nung agitsü aser alakteta jaokerji Deputy Commissioner of Police Zone-ll Aotula, IPS asütsü.
Sentong nung cleanest colony competition award osang sangdongtsü, Trionix Dance Studio nungi züngsemtemi tsüngsangtsü aser Abdon Mech, Meribeni Patton aser Bovito Swu nungeri musical presentation agitsü.