Zhaleo Rio-i DPDB senden ya süoki ia agitsü ajungshi

Dimapur, December 16 (TYO): December 16, 2019 nü Advisor Sericulture, Excuse & Minority Affairs, Zhaleo Rio-i, District Planning and Development Board (DPDB) senden nung o lemtepba sülen ang department balala ajanga sorkar mapatongtem inyaker, anungji iba senden ya kanga süoki ia agitsüla, ta sorkar ketdangsertem dang metetdaktsü.
Tanü Dimapur DC Conference hall nung Dimapur DPDB senden nung jembidang Advisor, Zhaleo Rio-i Dimapur District kübok Department balala nung tekolakpurtem dang, DPDB senden ajak nung adentsüla aser nüburtem atema tajungtiba inyaktsüla, ta ayongzük.
Dimapur ya ‘mini India’ ka amai lir, kechiyong yangi Naga nunger kin ajak aser India tesem balala nungi tangar jenti arua alir, anungji ‘duplications’ malitsü atema department balalai longjemer inyaktsüla, ta Zhaleo-i ashi.
DPDB sendentem nung registration atema society aika benoker, anungji Board züngsemtemi parnok indang documents aser nükjidongtemji kanga junga asadanger temsüa alirtem ang agizüktsüla, ta ashi.
Advisor-isa Dimapur DC, Anoop Kinchi, IAS pelaa agizüka pa dang, nüburtemi DC kaji tesayur ka ama züngshir, anungji maneni nüburtem tim lenmang nung anidaktsüner, ta ajungshi.
Senden nung Board züngsemtemi society balala registration agizüka sorkar matsüngdang benoktsü lemtet, aser item rongnung City Tower Business Owner Welfare Association, Signal Army Supply Road Junction nung Hitech Institute of IT & Multimedia lapoktsü, Japukong Sensor Telongjem Welfare Society, Western Chakesang Mother’s Association, Sisters’ of Providence Medziphema aser Tribal Synergy Society densema lir.
Tamalen lemzükja aliba ama senden nung Agri aser PHED, Rural & Urban department temi departmental osang metetdakja liasü.
December ita atema Dimapur DPDB senden ya Dimapur DC aser Vice Chairman DPDB Dimapur, Anoop Kinchi IAS leniba nung amen aser pai tepela o jembia senden tembang.