MLA T. Torechu süogo; Tanü ‘state funeral’ agitsü

Dimapur, December 16 (TYO): 60 A/C Pungro-Kiphire nungi MLA T. Torechu mapang talangka ka shiranga arur December 16, 2019 nü CIHSR Hospital, Dimapur nung lia asü.
Tanü Legislatures’ home nung asür T Torechu den ‘sent off service’ ka ayonga agi aser iba sentong nung mendenji Advisor & Panel Chairman Dr Nicky Kire liasü.
Sentong nung Chief Minister Neiphiu Rio-i o jembidang “asür Torechu ya medemer tajung ka aser chichiba lennir ka liasü. Pai nübortem kanga dang nendaka aser bendanga agüja tenzük” ta ashi.
Pa ya lokti nisung ka liasü aser teti nübortem den mapang endok. Pa lenisüba kübok Pungro district nung terenlok aika bentsür aruogo, ta Rio-isa ashi.
Pa den mapang talangka meteteper arudang, pai telemtetba agiba nungi masetshii noktak. Iba asükhu mapang par kibong nem tesünep aser tashi agüjang ta sarasademtsür, ta Rio-isa shisem.
NPF President, Dr. Shürhozelie-ia asür nem akhüm tetushi agütsüdang, party tenüng nung asükhu lemsatep.
Asür Torechu ya Pungro tesem nungi liasü aser pa ya kaketshir lennir ka, tesayur ka aser bendanga agütsüba public lennir ka liasü, ta Dr. Shürhozelie-i ashi.
Tesüiba küm 17 tsüngda pai pa aliba tesem nung terenlok mapa jenti inyaktsüogo. Pai Naga nunger atema noktakba atema onoki pa akhümtsübur aser meimer, ta paisa metetdaktsü.
“Pai Naga nunger meimba aser bendanga agüja inyakbaji otsü nung züluoktsü. Naga nunger ochishir nisung ka akoksaogo” ta NPF President-isa ashi.
Iba sentong nung Soil & Water Conservation, Geology & Mining, NSMDC Ltd Minister V Kashiho Sangram, Yimchungru Tribal council aser asür Torechu’er jabaso nungertemi o jembi.
Sentong nung State Chaplain Rev Kuzierang-i Tsüngrem dang temoatsü meshi aser Dy CM Y Patton-i anir Minister, Advisor, MLA aser sorkar ketdangsertem aika aden,
December 17, 2019 anepdang 11:00 ako nung asür T. Torechu den State Funeral agitsü, ta Home department-i sangdong ka nung metetdaktsü.
Iba sentongji Local Ground, Pungro Town nung agitsü, ta parnokisa ashi.
Maneni, Nagaland Governor R. N. Ravi, Chief Minister Neiphiu Rio, Opposition lennir TR Zeliang aser NPF President Dr. Shürhozelie Liezietsu nungertemi sangdong balala ajanga asür T. Torechu asüba atema mang ayimba aser tasür kibong nem tashi aser tesünep meshiba osangtem metetdaktsüogo.