NPF-i Lok Sabha MP, Dr. Lorho nem show cause notice agütsü

Kohima, Luchii/December 19 (TYO): Tawa Parliament nung CAB/CAA onük nung Lok Sabha MP-i inyakba mapa dak sendakba nung o lemteptsü atema Naga People’s Front (NPF) Disciplinary Action Committee (DAC) senden December 19, 2019 nü Central Office Kohima nung menogo, ta DAC Chairman, Blaise Iheilung aser secretary, Tsumongo Ovung nati sangdong ka ajanga metetdaktsü.
Iba dak sendakba nung NPF DAC-i Lok Sabha MP, Dr. Lorho S Pfoze nem show case notice agütsüba nungji yamai shia lir, “Nü nem NPF ticket agütsü aser Outer Manipur Parliamentary Seat nungi MP (Lok Sabha) shim. January 30, 2019 nü ‘Core Committee’ senden amendang aser January 31, 2019 nü Central Executive Council (CEC) senden amendang bangzüng ka renem, aser senden anaprong nung Citizenship Amendment Bill (CAB/CAA) anemtsü atema lemteta liasü. March 30, 2019 nü NPF Central Office Kohima nung Party Consultative senden nunga kasa bangzüngji renema liasü.”
“Tang na NPF nung CEC züngsem ka lir. Anungji nati party bangzüng nung aliba ama inyaktsü/vote agütsütsüla. Ajisüaka party bangzüng alema Indian Parliament Lok Sabha nung December 12, 2019 nü nai CAB/CAA 2019 pusema vote agütsü. Anungji na anema kechiba Disciplinary Action magitsü, iba kuliji nai agüjang. Iba notice agütsüba anogo nungi tenzüka anogo tenet (7) tashi nung mesüra December 26, 2019 tashi nung nai telangzüba agüjang ta tuyur,” ta DAC-i pa nem metetdaktsü.