NPF DAC-i Rajya Sabha MP, K.G Kenye nem show cause notice agütsü

Kohima, December 19 (TYO): Tawa Parliament nung CAB/CAA onük nung Rajya Sabha MP-i inyakba mapa dak sendakba nung o lemteptsü atema Naga People’s Front (NPF) Disciplinary Action Committee (DAC) senden December 19, 2019 nü Central Office Kohima nung menogo, ta DAC Chairman, Blaise Iheilung aser secretary, Tsumongo Ovung nati sangdong ka ajanga metetdaktsü.
Iba dak sendakba nung NPF DAC-i Rajya Sabha MP, KG Kenye nem show case notice agütsüba nung yamai shia lir, “Nü nem NPF ticket agütsü aser Nagaland state nungi MP (Rajya Sabha) shim. January 30, 2019 nü ‘Core Committee’ senden amendang aser January 31, 2019 nü Central Executive Council (CEC) senden amendang bangzüng ka renem, aser senden anaprongla nungji Citizenship Amendment Bill (CAB/CAA) anemtsü atema telemtetba agia liasü. March 30, 2019 nü NPF Central Office Kohima nung Party Consultative senden nunga kasa bangzüngji renema liasü.”
“Tang nai NPF nung Secretary General menden bena lir. Anungji nai party bangzüng nung aliba ama inyaktsü/vote agütsütsüla. Ajisüaka party bangzüng alema Indian Parliament Rajya Sabha nung December 12, 2019 nü nai CAB/CAA 2019 pusema vote agütsü. Anungji na anema kechiba Disciplinary Action magitsü, iba atemaji nai kuli agüjang. Iba notice agütsüba anogo nungi tenzüka anogo tenetnü (7) tashi nung mesüra December 26, 2019 tashi nung nai telangzüba agüjang ta tuyur,” ta NPF DAC-i pa nem metetdaktsü.