Linük tesem aika nung CAA anema longkak ait

New Delhi, December 19 (Agencies): Brihostibarnüa India linük tesem aika nung Citizenship (Amendment) Act, 2019 anema longkak sashia aitogo.
Tanü Jantar Mantar, Delhi nung nisung aika adenshia longak ait aser Red Fort o Mandi House na nung curfew ozüng liaka longkak aittsü adenshiba atema Left party lenirtem- Raja, Sitaram Yechury, Nilotpal Basu, Brinda Karat, Congress lenirtem- Ajay Maken aser Sandeep Dikshit aser activists Yogendra Yadav den Umar Khalid nunger densema aika apu.
Gujarat: Tanü Gujarat kübok Ahmedabad nunga CAA anema longkak aitertemi dokan aika raksatsü aser police gari raksatsüba den külemi police 15 yirutsüogo.
CAA anema longkak aitertemi Ahmedabad nung police dak long agi aonba ajanga parnok aika yiru.
Uttar Pradesh: Tanü UP yimtiba, Lucknow nung CAA anema longkak aitertemi police dak long agi aonba den külemi police post ka raksatsü aser police post kima aliba gari aika rongdoktsüogo. Longkak aitertemi long amshiba agi police-i teargas amshiba den külemi ajok agi azük. Lucknow nung longkak aiter 55 puogo.
Osangbenertem den jembidang UP DGP, OP Singh-i, “Yimti nung nisung 55 puogo aser onoki CCTV noksa reprangdar. SSP Lucknow-i aibelenertem anema inyaktsü,” ta metetdaktsü.
Lucknow nung injang agi yirua longkak aiter ka asüba dak sendakba nung Singh-i, “Onokibo (police) injang meyok. Kodaser nisung asüar ni memetet. Ibaji longkak aitba mesüra police-i inyakba den sendaktepa mali,” ta metetdaktsü.
Bihar: Tanü Bihar nunga tesem aika nung Left party temi CAA aser NRC anema state tesem ajaklen mokdanga longkak aitogo. Talisa Patna, Vaishali, Darbhanga, Jehanabad, Saharsa, Aara aser Khagadia yimtitem nung longkak tesashiba ait.
Madhya Pradesh: Brihostibar nikongdang Madhya Pradesh nunga tesem kar nung CAA anema longkak sashia aitba sülen ketdangsertemi district 44 prongla nung curfew ozüng (nisung pezü dak tali madenshitsü) benokogo.