Association of Gorkha Baptist Churches Nagaland pur 12 buba mungdang tembangogo

Dimapur, Aenjeti/Jan. 12, 2020 (Agencies): Association of Gorkha Baptist Churches Nagaland (AGBCN) pur anogo asem tashi agiba 12 buba Annual General Conference, January 12, 2020 anogo Singrijan, Dimapur nung aliba mission centre nung tembangogo.
Iba mungdang ya “Rooted and growing in Christ” (Kolosi 2:7) omen nung ajemdaker among, kong Macky City, Australia nung aliba Christian City Church nung pastor, Peter Loosemore ya tongti o jembir liasü, shibai mungdang nung adener dang temulung taroktiba nungi Yisu Khrista dak tamang akatsü atema tanüla alitsü ajungshi aser taküm tzü agizüktsü ayongzük.
Nisung aika tekolok nung Tsüngrem lir, saka temulungjang nungi Pa magizük, anungji taküm Tsüngrem tsütsüi anir aotsü asoshi nisung kati Tanüla Temeshi nüngdaker, ta pai ashi.
O jembiri taneptsü angutsü aser Tsüngrem agizüktsü asoshi balaka sarasademtsü. GBC Diphupar pastor, Gideon Gurung aser GBC Khehokhu pastor, Bindo Lama nati iba mungdang nung anepdang Bible study agia liasü.
Iba mungdang tembangba anogo nung Model English School Mon proprietor Raju Thapa aser Murise Baptist Church pastor, Tsaose Sangtam nati salem o aben. Nepali Baptist Church Tuensang ajanga tekülem aser tetushi mapang agi aser arogo balala nungi temeja ken aser sobaliba dak sendakba yimya nung shilem agia liasü.
Iba mungdang nung NBC Jessami, Manipur ya associate züngsem ka kümdakja iba Association kübok affiliate süa aliba arogo 50 ajung.
Nepali/Gorkha nunger reverend asem Rev B Amos, Rev K Mero aser Rev C P Sharma nungertem kinunger atema palaka sarasademtsü, shirnok taoba küm iba lima nungi pila.
AGBCN mendenpuba Tek Gurung lenisüba kübok business session agia liasü, kong AGBCN Executive Secretary Santabir Rai, Mission Secretary Hari Magar, Women Secretary Beena Thapa, Youth Secretary Sishir Gurung, Chairman Pastors’ Fellowship Pastor Surjay B Sapkota aser Resource & Development Committee Chupaman Rai nungertemi osang balala bena liasü aser Association ajungkettsü aser renloktsü mechi arogo balalai olong bendenba jembi.
Iba mungdang ya Dimapur district kübok Diphupar, Khehokhu, Padumpukhuri, Xukiye, Zaka, Nikiqhe aser Khushiabill yimtsüngtem nung aliba Nepali/Gorkhali Baptist Church tenet-i ayonga liasü.
Iba mungdang nung Nagaland nung aliba Nepali aser Gorkha arogotem 40 nungi delegates 400 aser tamangertem den külemi Assam aser Manipur nungia arua dena liasü.