Himanta Sarma-i Assam CM kümnür: Badruddin Ajmal

Guwahati, January 12 (Agencies): Assam Finance Minister Himanta Biswa Sarma-i chief minister inyaknür aser iba jagi BJP raksatsür ta All India United Democratic Front (AIUDF) tanishir Badruddin Ajmal-i ashi.
“Küm aika Sarma-i chief minister inyaknüa arur. Iba pungmang bener pai Congress toktsür aser tang telung nungi BJP raksatsür. Pai Sarbananda Sonowal anendaktsür pa chief minister kümnür” ta Ajmal-i osangbener dang ashi.
Assam nungertemi medemertem aser tsükchirtem mebendangra Badruddin Ajmal ya chief minister akümtsü ta tawa tu Sarma-i olen ka jembiogo.
“Sarma ya yimtenren asadanger tajung ka lir aser pai koba party-i takok angutsü’ar asadangteter. Iba ya pai kü nem temoatsü agütsür ama amanger aser pa dang kanga pelar. Ajisüaka, pai chief minister inyaknüba pungmang kü nem agütsüba atema jashia bilemer. Parnoki Muslim nunger ka chief minister akümtsü ta shia Hindu nunger anisatsü meranger. Parnoki tetsübu tensa ka adokdakja votes angutsü meranger” ta Ajmal-i ashi.
“Onok tashi angutsü atema aruba masü. Onok opposition ka ama lir aser iba ya democracy ka nung kanga dang tongtipang jenjang ka lir. Opposition melira, sorkar dang tashir malitsü aser parnoki kechi inyaker lila’ar meshitet. Parnoki Hindu Rashtra ka kümtetnür” ta paisa shisem.
BJP lennirtem aser züngsemtem dak alaka linük nung nütsüng yongsük shilem 90-ibo Citizenship Amendment Act magizüker. Sorkar ya air-conditioned rooms nung alir aser iba jagi parnoki mangateter saka asen linük rongdar. Iba ya Hindu mesüra Muslim onük masü saka Constitution of India lir. Taruba elections nung BJP-i telangzüba angutsü” ta Ajmal-isa metetdaktsü.
Tawa Jharkhand elections nung BJP-i tamakok angu aser Delhi nunga tamakok angutsü. Delhi nung AAP-i menden teimba nung takok angutsü aser BJP-i menden 4-5 ka nung dang takok angutsü ta asadangteta lir. BJP-i iba linük nung kobika yimsü asütsü’ar lemtettsüla. Parnoki mapang talang ka yimsü sünüra, Hindu aser Muslim nunger den külemi inyaktsüla, ta paisa ashi.
“BJP-i Parliament nung tashiyim amshia Arrla 370 agien aser Citizenship Amendment Act bener aru, saka ajak tiptema akümtsü. Linük nung nübortem aser kaketshirtemi ozüng anema lungkak aiter. Kodang asenoki parnok anema ola adokdir, Pakistan-i oang ta parnoki ashi. Parnok ya Pakistan atema jembitsürtem asü? Asen oboula nungertemi India atema azü tenlaa mapa inyak. Iba ya asen linük aser kodanga toktsür maotsü” ta Ajmal-isa metetdaktsü.