Tripura chuba jabasoi ayongba sentong nung nisung aika aden

Agartala, January 12 (Agencies): Tripura chuba jabaso aser taoba TPCC Tir Pradyot Kishore Manikya Debbarma-i tawa tentetba Tripura Indigenous Peoples Regional Alliance (TIPRA)-i ayongzükba sentong nung nisung meyirjang 20 shi ka aden.
Parnoki CAA anema lungkak aitba sentong ka agi aser ibaji Dasharam Para nung tenzük. January 8, 2019 nü iba kasa tesem nung CAB anema lungkak aiter nisung pungu police injang agi yiruja liasü.
Tanü agiba sentong nung Indigenous Party aser telok aika nungi tanishirtem aden.
Sentong nung Patal Kanya Jamatia (TPF President), Brishwaketu Debbarma (IPFT MLA), Ranjit Debbarma, Biswajit Kalai (TSF President), Mintu Debbarma, Ananta Debbarma (taoba IPFT Vice-President) nungertemi CAA anema jembi.
Pradyot Kishore Maniya-i o jembidang “CAA anema longjemer ola ka dang adoktsüla” ta ashi.
Paisa telok balala nungi tanishirtem adenba atema pelaba shisem.
“Ni nenok dang langka ka jangjatsünür. Iba ya yimtenren sabang ka masü. Yangi BJP, Congress, IPFT, INPT CPI (M) telemsa kecha mali saka TIPRASA dang lir. TIPRA ya nübortem longjemtsüba sabang ka lir. Taoba mapang ni Poila Jati Ulo Party ta jembi saka tang nungi Poila Jati Ulobo Jati ta ashir” ta paisa metetdaktsü.
“Ni Congress party nung liasü aser party-i kü dang Supreme Court nung ni NRC anema benokba ken o agientsü atema ashi, saka ni memulungi party toktsü. Ni küm ka tejaklen sentong ka nung BJP dang ashiba olen kasa ni tanü-a ashir- nenoki Bubagra (Tripura Chuba memetet)” ta Debbarma-isa ashi.
“Tesüiba küm 22 tashi Kanchanpur nung asen Bru nunger timtema arur. Tanü India sorkari Bangladesh nunger anir arunür saka Bru nunger ya India sensotem sernnung küm 22 tashi timtema arur. Political party shingaia parnok asoshi mapa meinyaktsü. Yangi Tripura nung Bru nungertemi temeten angutsü” ta paisa shisem.
Paisa Tripura nung aliba Bengali nunger dne meraratsü atema mepishi.
“Iba Bill ya Tripura nung aliba Bengali nungertemi yangluba masü saka BJP-i yangluba lir. BJP-i West Bengal nung takok angutsü mechi Tripura nung timtem agütsür, saka onoki Supreme Court nung temetentem bener tokteptsü. Parnoki votes angutsü atema CAA aginür saka NRC maginür. Yangi alibva Bengali nunger dang mejashitsüla saka asen tsükchirtemji Delhi nung asen temeten yoka achiba yimsüsürtem lir” ta Debbarma-isa ayongzük.
“Taoba küm 70 tashi item yimsüsürtemi asen kin samatsüogo saka ni taküm lir aser Supreme Court nung oa ozü nübortem atema raratsü. Ni aiben tamakok nguogo saka kü tango mesadem tashi ni nenok atema raratsü” ta paisa ashi.
“North East kübok tanga state tem nung Young Mizo Association (YMA) ama teloktem lir aser parnoki nübortem atema noktaker aser yimsüsürtemi parnok ashi angar. Saka yangi Tripura nungbo asenoki yimsüsürtem tashi angar aser parnoki aiben asen temetentem Delhi nung parnok tanishirtem dang yoka chiogo. Saka tang nungibo yimsüsürtemi asenoki ashiba angatsü” ta Debbarma-isa TIPRA tentetba indang olen ka ashi.
Honibar agiba sentong nung tongtipang tatalokba kaji IPFT Tipraha President Nakshatra Debbarma-i par telok toktsür Pradyot Kishore Manikya Debbarma den aden.