Miura-i arrshi küm 52buba nung Yokohoma den tenangzüktepba tasen yanglu

Aenjeti/January 12, 2020 (Agencies): Kazuyoshi Miura-i Honibarnü J-League club Yokohama FC den tenangzüktepba tasen ka yangluogo, koba pa asoshi season 35buba asütsü.
Arrshi küm 52 tain Japan nunger football asayar ya taoba season nung Yokohama nung amendaker aliba club nungi asaya asem nung dang asayaa liasü aser pai goal ka danga magütsütet. Pa February 26 nü küm 53 ajungtsü aser league nung asayartem rongnung maneni tambusang asütsü.
2017 küm Thespakusatsu Gunma den asayaba mapang goal ka idaktsüba sülen professional football asayar goal idaktsür rongnung pa tambusang aküm aser Guinness World Records-i iogo. Yokohama, Japan, Nippatsu Mitsuzawa Stadium nung iba asaya Yokohoma FC-i goal 1-0 agi koka liasü.
Iba goal idakja Stanley Matthews indang record (goal idaktsürtem rongnung tambusang) ajangtetba sülen ita 33 dak tema nung pai goal ka danga idakja mali.
Arrshi küm 38 asüdang pa 2005 küm Yokohama FC nung aden aser pa asaya 250 dak tema nung asayaogo. 2000 küm retire masü tsüngda Japan team nungi asayaba mapang pai asaya 89 nung goal 55 idaktsüogo.
Pa mezüng Brazil club Santos nungi asayaa football career tenzük aser iba sülen Japan nung Tokyo Verdy aser Vissel Kobe nungi asaya. Maneni pa Dinamo Zagreb, Genoa, Sydney FC nungi asayaogo Bournemouth nungi asayatsü atemaa trial agia liasü.
“Arrshi küm 18 asüdang professional akümba mapang tejangraba koma liasü yamaji tanüa football asayatsü asoshi tejangraba kasa dang lir,” ta Miura-i taoba küm pa arrshi küm 52 ajungba mapang osang bener dang shia liasü.
Yokohama FC pur 2020 season J-League nung February 23 nü Vissel Kobe den mezüng asayatsü.