Delhi, Arunachal-i aoba sülen dengue agi shiranger

Guwahati, September 20 (Agencies) : Kamrup (Metro) district nungi dengue agi shirangertem tesadang ka dengue agi kongshia aliba tesemtem i aoba sülen shirangba bushitetogo, ta Assam state health department ketdangsertemi ashi.
Honibar tashi nung Assam nung dengue agi shiranger nisung 80 ajungba osang lir aser shiranger timba alibaji Kamrup (Metro) district lir. Iba den Arunachal den arrtsüa aliba district tem nunga dengue agi shirangertem lir. August 30, 2015 tashi nung Arunachal Pradesh nung dengue agi shiranger parnok 1,560 liasü.
Kamrup (Metro) district kübok Guwahati city aser Kachari Basti, Christian Basti Hill Top, Bamunimaidan, Ujjawal Nagar o Lokhra nungertem dena lir.
Assam aser Arunachal nung Japanese Encephalitis, dengue aser malaria amala tashidaktem kanga bulua adoker. Bushisüngdangertemi bushitetba agi Aedes aegypti aser Aedes albopictus merlatem ajanga dengue adokdaktsür.
Item merla ya jana aser gari battery, drum aser tyre tazüngtem nung alir. Guwahati ama tesem ka nung itemji kanga bulua angur. Aedes aegypti ta ajaba merla yagi tyre tejen nung aser Aedes albopictus merlai battery box tazüngtem nung kanga züiner, ta health ketdangsertemi metetdaktsü.