Afghan nung temokong agi nisung 17 asü

Kabul, Aenjeti/Jan. 12, 2020 (Agencies): Kanga mokongba ajanga Afghanistan nung Honibarnü nisung tajemba agi 17 asü, ta sorkari ashi, kong rer kanga sashia alar aser tzünglu maneni arur.
Afghanistan nung iba ama tzüngsang mopung ya tang tasen masü, aser iba mapang meputepi aliba telok balala tsüngta rara anena atar, saka taküm tesashiba lir, ta iba linük tzüngsang mopung takzürtemi ashi.
Maneni asürtem timba akümtsü akok, ta ketdangsertemi ashir, kong Afghanistan indang Natural Disaster Management Authority ajanga asürtem tejangja bendenba mapang lir.
“Linük nung onoki iba ama tzüngsang temokong arutsü imla meliasü,” ta Natural Disaster Management Authority indang odongtar Tamim Azimi-i osangbener dang ashi.
“Rer kanga sashia alaba ajanga nisung asü, ta onoki osang angashi, saka tang tashi onoki asür tejangja memeteter,” ta paisa ashi.
Honibarnü asüba ajanga taküm asükwa nung asür nisung 24 jungogo, aser linük tesem kar nungbo temperature ya minus 12 degree Celsius (10 Fahrenheit) tashi lua lir.
Küm tasen tenzükba sülen rer kanga sashia alaba ajanga tongtibang lenmang aika shibanga lir, aser item rongnung Salang Tunnel dena lir, koba ajanga central Afghanistan aser linük north tsütsü sendakteper, aser Kabul-Kandahar highway dena lir.
Afghanistan anüolen Herat province nunga rer kanga sashia ala. Honibarnü rer kanga sashia alaba ajanga ki ana kilem chirepa nisung ti asü aser item rongnung tetsür aser tanur dena liasü, ta Herat province governor odongtari ashi.
Linük tesem tangalena tzünglu kanga sashia aru.
“Aruyaa aliba anogotem nung tali temokongba asütsü imlar,” ta meteorological department indang forecasting wing tekolakba, Mohammad Nasim Muradi-i ashi.