Niger mitkar alidak amakba lendong nung asür 89 jungogo

Niamey, Aenjeti/Jan. 12, 2020 (Agencies): Brehostibarnü tsükchirtemi Niger army amenoka aliba tesem amakba nung asür 89 jungogo, ta security osang ajanga ashi. Taoba ita lendong ka nung Niger sepai 71 taküm samaja liasü.
Brehostibarnü sorkar sangdong ka nung sepai 25 tepset, ta shia liasü aser kasa sangdong nungsa parnoki Chinagodrar jila nung motorcycle aser gari kar bener arua amaker takok ngua aridok, ta sangdonga liasü.
Security osang pezü ajanga Reuters news agency dang ashiba agi, iba lendong nung asür Niger sepai tajemba agi par 89 tasümang Honibarnü linük yimtiba, Niamey nung arem.
Item rongnung osang ka ajanga ashiba agi, asürtem ya timba alitsü akok, kechiaser asür sepai kar Chinagodrar nung Brehostibarnü sa arem.
Defence Minister Issoufou Katambe-i ashiba agi, Deobarnü national security council senden ka amenba sülen asür tejangja metettsü.
ISIL (ISIS) telok den sendaktepa aliba telok kati anasa Inates tesem nung sepai 71 tepseter ita ka lir Chinagodrar lendong ya atalok, aser iba ajanga Mali aser Burkina Faso den arrtsüa aliba Niger linük nung tensa tamajungba akümba sayur.
Linük balala nungi sepaitemi ISIL aser al-Qaeda den sendaktepa aliba telungpurtem anendaktsütsü merangaka Niger nung tesüiba küm ishika tsüngta lendong atalokba tali kümogo, aser nisung 400 jungnüa taküm samaogo, ta Armed Conflict Location & Event Data Project, non-profit organisation ka ajanga sangdong.
Lendong agütsür tsübudaktsütsü mechi French fighter jet tem Brehostibarnü yoka liasü, ta France regional taskforce ajanga ashi, aser iba ajanga lendong tuluba matalok südi.
Iba lendong agütsüba telok katia tenüng agia mali, saka Katambe-i Hokulbarnü ashiba agi, mitkartemi telungpur anema rara tasen tenzüktsü.
Taoba hopta lendong atalokba tesem nung sepai aikabo mali, ta Nigeria yimtiba, Abuja nungi osangbener kati ashi.
“Sahel region nung linük tulu lir aser yangji sepai kangabo mali. Item telungpur tasü taitba akümer.”
“Mali nungi aruba telungpurtemi lendong ya agütsü, ta osang kar ajanga ashi. Item telungpurtem den raratsü asoshi iba region nung sorkar dak tashi peria mali, anungji iba amala lendong tali ataloktsü, ta yangji aliba nüburtemi amanger,” ta paisa ashi.
West Africa indang Sahel region ya Sahara kübok nisung ajema aliba tesemtem lir, kong 2012 küm nungi tenzüka ethnic Tuareg telungpur aser parnok den tera sendaktepa aliba telungpurtemi northern Mali shilem asem küma lemsar shilem ana atsüngsep, aser France teyari ajanga khen asoshi parnok iba region nungi arudok.