Tayimtsü khazüka yokba mechi Iran nung longkak aiter

Dubai, Aenjeti/Jan. 12, 2020 (Agencies): Iran mitkartemi Ukraine nunger tayimtsü aibelena khazüka yok ta nangzükba sülen Honibarnü nüburtemi ketdangsertem mapa nungi anendaktsütsü asoshi Iran lenir nem takhangba agüja longkak ait tenzü, kong tayimtsü ya US-i khazüka yok südi ta temulung melemteti tsübua liasü.
“Asen tsükchirji America ta parnoki tiazü jembir, asen tsükchirji yangi lir,” ta Tehran nung aliba university tezülen longkak aitertemi ayimtenba video ka Twitter nung post süa liasü. Tanga yimtitem nunga longkak aitertem adenshia aliba noksa nguogo.
Social media nung post süa aliba ya osangbener temi tejangja meshitet. Saka Iran mitkartemi aibelena Ukraine nunger tayimtsü ya Bodhbarnü khazüka yok, ta nangzükba sülen longkak ait tenzük, ta sorkar den sendaktepa aliba media temia metetdaktsü. Iba tayimtsü nung nisung 176 mena liasü aser parnok ajak asü.
Tehran nung alirtemi osangbener dang ashiba agi, Deobarnü linük yimtiba, Tehran nung sepaitem aika adenshia liasü, kong Canada aser United State linüki tayimtsü ya missile ajanga khazüka yok ta shiaka mitkartemi miimshiba ajanga nüburtem tali mepelai aküm.
Honibarnü linük yimtiba nung longkak aiter nisung meyirijang aika adenshia alidak riot police temi teargas khaloktsü, kong nisung aikati “Death to the dictator” ta ayimtena parnok tejashi ya Islamic Republic indang Supreme Leader Ayatollah Ali Khamenei dangi meyiptsü.
“Tatok meshiang asen mapa nungi anenang, kechiaser nüburtemi akhangba ya tayimtsü lendong meshidaki amshiba mechi lir,” ta Deobarnü Iran nung Etemad osangkaket nunga zülua liasü.
Taoba küm November ita longkak aiter anema linük ketdangsertemi azüdokshir lia tang iba timtem ajurur, kong US tenokdangba kübok linük rongsenketsüng jenjang kanga mejungi akümer.
US-i Iran mitkar tanishir ka tepsetba ajanga mang yanga Iraq nung US sepaitem amenoka aliba tesem ana nung Iran-i missile khaloktsür lia Ukraine International Airlines tayimtsü ya apusor minute ishika tsüngda khazüka yok. Iba tayimtsü nung mena alir ya aika Iran nunger senso ana bener alirtem aser par 57 Canada nunger passport bena alirtem liasü.
Ibai tesama tulu aketba aibelen ka lir, ta Iran tiri ashi aser tatok nangzük. Saka Revolutionary Guard commander kati nüburtem tali ronga atutsüsa, Iran nunger missile kati tayimtsü nung akha ta ketdangsertem dang lendong atalokba anogo metetdaktsü, ta ashi.
Guard indang tanishir Hossein Salami-i ashiba agi, iba tatalokba mechi nisung ajak dang onok tejashiba lir.
Saka karibo Iran tsükchir temi iba lendong nung ajemdaker anishir, ta ashir. Iran-i US aser par den sendaktepa aliba linüktem ya par tsükchir ama züngshir.
“Mitkartemi aibelenba atema Iran tsükchirtemi Guards dak mang ayangtsü meranger,” ta Quods Force nungi Khamenei indang representative, Ali Shirazi-i ashi.
Honibarnü longkak aitba sülen US Tir, Donald Trump-i Twitter nung, “Taoba mapang ama yimjung nung longkak aiter takümtem mesamatsütsüla mesüra internet meshibangtsüla. Alimai repranger,” ta zülutsü.
Kasa anogo Iran nung Britain ambassador mapang tatsüka pua yur chiok, shibai longkak aittsü ajungmeso, ta Iranian media ajanga ashir.
January 3 nü Iraq nung US drone ka ajanga tejangja Iran nunger sepai tanishir Qassem Soleimani tepset aser iba mang yanga Tehran-i Iraq nung US sepaitem amenoka alidak missile khaloktsü. Iba mapang US sepai kata masü saka tensa mejungi aliba mapang Ukrainian Boeing 737 ya Tehran airport nungi apusotsü lenmang lapoktsü aser aibelena khaloktsüba missile ka ajanga khazüka yok.