Assam nung Naga tsür ka ket nungi sen lac. 20 jenjang brown sugar apu

Guwahati, January 12 (Agencies): Honibarnü (January 11, 2020) Assam Police-i Guwahati nung aliba Paltan Bazar nung temesepba mozü shibelener tetsür ka puogo, ta osang ka ajanga metetdaktsü.
Honibar anepdang Paltan Bazar nung aliba Bata Showroom anasa tetsür kati mozü shiblentsü aliba osang Paltan Bazar Police-i angazükba sülen police-i mita atar tetsürlaji apu aser la ket nung sen lakh 20 shi jenjang Brown Sugar apu.
Tetsürlaji Nagaland yimtiba, Kohima nungi arishi küm 32, Asalii ta ajala Velazolu liasü ta jangjaogo, ta kasa osang ajanga metetdaktsü.
Police-i tetsürlai bena aliba sapon taseptsü 19 nung Brown Sugar gram 270 bena aliba apu. Police osang ajanga ashiba agi, tetsürla jagi state tesem ajaklen ayoktsü atema Brown Sugar ji Dimapur nungi Guwahati-i bener aru.
Mozü shibelenba dak sendakba osang tejangja metettsü atema Assam Police-i tetsürla dangji asüngdangyadar. Northeast nungi International market nung mozü shibelentsü atema Guwahati ya tiyongtsü ka kümogo.