Chakhesang nunger Sühkrünye benjung Jan 15 nü amongtsü

Phek, Aenjeti/January 12 (Agencies): Chakhesang nunger atema tongti benjung ‘Sühkrühnye’ January ita nung amongtsü; iba benjung nung tamangba külemküja dak sendakba sentong balala ajanga tetsür-tebur ajak meshiteter, ta osang ka ajanga metetdaktsü.
Sühkrühnye benjung ya anogo 10 nü amongtsü aser benjung jakdang anogo ka jelia benjung atema renemshiba anogo dang ‘Thiza’ ta ajar; iba anogo nung shiruru tepseter aser benjungmong atema renemshia amonger.
Benjung tenzükba mezüngnü dang ‘Cedü’ ta ajar aser anogo ka jelia tepsetba shiruru balala shi iba anogo nung renemer, aser benjung atema mejemtzü renema aliba-a iba anogo nungjisa lapoker.
Benjung tanünübuba dang ‘Thupu Sühkrüh’ ta ajar aser iba anogo nung tebürtemi külemküjaa tebur chanutem aser tai maket teburtem meshitettsür. Iba külemküja (Sühkrüh) atema chipo-aonpo aser atepzüng densema osettsüset ajak tasen amshir.
Iba anogo nungsa anepongi an kongli teburtem tzüpo-i oa tzü chigua parnok meshiteter. Iba sülen memeneni aliba tzü temerükji temeshi ta züngshia kidangi tar adoker. Iba sülen sobaliba yimya nung mi apua tarak maket an-tebong ka rangseta temeshi tzü nungji soa achir, koba ajanga teburtem akümli piyong meshiteta alitsü. Teburtemi ki tasen asüba mapang nunga kiji meshitettsü atema ‘Sükhrüh’ ya benshir.
Iba anogo nungsa teburtemi sang nung ozü aputsü atema aremi aoer aser parnoki apuba ozütemji Sühkrühnye temaitsü aou talang ka tepor junga songer aou talak nungji ozüji ayur. Ozü tapu balala apubaji ajanga nisung shia tarutsü tia ashir ta parnoki amanga aru.
Tasemnübuba dang ‘Thüno Nuso’ ta ajar aser iaba ya tetsürtem kija atema lir. Tetsü kati iba ya benshia tai maket jalatem meshitettsür. Parnoki tarak maket an tepseta asor aser akümli piyong meshiteta alitsü atema achir.
Pezünübuba dang ‘Thunye Zadi/Müthi Cehu’ ta ajar aser iba anogo nung lokti chiyungteper mesüra züngartem chiyungteper. Yimtsüng kar nungbo iba anogo nung Zhotho Muza tenzüker. Iba anogo nungbo külemküja tenokdangbatem mali.
Pongnübuba dang ‘Cecü Zhongu’ ta ajar, iba tetezü item benjung takok anguba lir. Trokünübuba dang ‘Meve’ ajar aser iba anogo nung tarutsü nung mi lendong densema alima lendong balala nokdangtsü atema külemküjar.
Külemküjatem ajak tembanger asünung parnoki maneni chiyungtepa benjungteper, tsüngsanger aser ken atener. Kasa anogo nung parnoki anogo piyong sasisapong balala asayar.
Iba sülen benjung anogotemji ‘Sühre Gada’ anogo ana amonger aser item anogo nung mapa meinyaker. Benjung tatembangbuba anogoji ‘Thunye Zho’ ta ajar aser iba anogo nung küm piyong atema renemtsü asoshi meshiteta amonger.
Ajisüaka asen lima nung Khristan tamangba yimsü aruba sülenbo yimtsüng timba ka nung iba benjung dak sendakba külemküja magir, saka Khristan tanela nung Phek district kübok Chakhesang nungeri iba benjung kanga longso-longbena amonger.
Chakhesang nung Sühkrünye tongti benjung ya January 15, 2020 nü amongtsü.