Minister Imna Along-i JYM 2020 nung aden

Dimapur, January 12 (TYO): HE & TE aser Tribal Affairs Minister Temjen Imna Along-i 8 buba Japukong Youth Meet 2020 tembangba sentong nung aden.
Temjen Imna Along ya State President BJP Nagaland Tir lir aser Alongtaki mandal BJP President den BJP party Karyakatas aikati pa meiner ao, ta PRO to State President, BJP Nagaland-i sangdong ka nung metetdaktsü.
Iba sentong nung EAC Longchem kübok sorkar ketdangser aika, public lennirtem aser sensotem aden.
“Japukong kübok yimtsüng 9 aliba nung tang yimtsüng 16 kümogo aser akhidang nungi telongjem indang jembia arur saka asangsang nung ibaji atalokba mangur. Nisung kija shia nungi tenzüker lokti ajak nung mangatettep adoka lir. Anungji, lanurtemi mapa meinyaki sen angutsüba mesüra tim masüba ajanga maongka angutsü atema mebushitsüla. Nenoki alizüngtem yur merangtsüla” ta Minister Imna Along-i ayongzük.
Kaketshirtemi tazüngba wadang nung takok tajung angutsü atema merangtsüla. Yamaji süra, tanü asen loktilibai telongjem indang süngjang chidangtsü aser tebilemtsü abenba senso tangatetba lidaktsütsü, ta paisa ashi.
Minister Imna Along-isa JYO nem tenüngsang agütsü aser volleyball asayatsü jangraba lanurtem asoshi sen lakh 5 corpus fund agütsü.
Iba sen ajanga Japukong kübok aliba yimtsüngtem nung tetsür aser teburtem training agütsütsü aser iba mapaji JYO-i ketdangsüa inyaktsü, ta pai ashi.
8 buba Japukong Youth Meet 2020 nung Lakhuni men Team aser Japu Women team-i takoktem angu.
Poang Lum salem: Maneni, Minister Imna Along-i Chang nunger dangi “Poang Lum” salem osang abener, ta PRO-isa metetdaktsü.
“Chang nunger dangi Poang Lum benjung salem tulu abener. Temoatsü ajak agütsüsang Tsüngrem nem tenüngsang agütsüba agizükang aser Pai nenok ajak nem temoatsü küm ka moajangma” ta Imna Along-i ashi.