68 buba AKM lokti senden Khar yimdak amungtsü

AKM ketdangpurtem den 68 buba planning committee telen balala züngsemtem aser Khar yimden yimsüsürtem külemi tangokba noksa nung angur.

Mokokchung, Jan 12 (TYO): Ao Kaketshir Mungdang (AKM) 68 buba lokti senden tan ita Jan 15 nungi 17 tashiji Khar yimdak amungtsü asoshi sentong renema lir aser iba asoshi AKM ketdangpuri anir planning committee telen balala ajak kanga mazüngi petepa inyakdaki. Taküm iba mungdang ya “Süngsashidi” (reinvigorate) omen dak rangloker amunger.
Khar yimdak mungdang kiji lenten-metong nung feet 90 x 170 süa lir. Iba den mungdang tongti kishilenji arju tulu ka den tilala 6 yanglua kar – iba tamaitsüji AKM kübok tzükong trok (6) aliba tatishitsü sayuba lir.
“Iba mungdang dak sentakba nung telen balala küma lemsar maparen ajak tenzükogo aser iba mungdang takok ngua mungtettsü imlar”, ta 68 buba AKM Planning Committee tayonger, S. Panger Ao-i iba osangbener den jembidang lemsatep.
Taküm iba mungdang nung tongtibangsa “Ao oshi sabua wazüka ayutsü, sorkar dak nentaka melii pei sasa pokyim peria züsenteta litettsü asoshi aser tang teinyakdak wadangtem, ano tejakleni awaa oa inyaktsü alibatem ajak nung ayimjema süngsashidi ta asüba nung onük kar bener arua shisa lemsatepba akatsü, aser iba nungji mungdangsanger ajaki shilem agitettsüsa sentongji renemdangogo”, ta paisa omen teratet kar lemsatep.
Iba mungdang nung Nagaland Agriculture and Co-operation Minister, G. Kaito Aye alakteta jaoka lir. Nagaland Higher & Technical Education & Tribal Affairs Minister –Temjen Imna Along ajanga iba mungdang lapoktsütsü aser mungdang shibangba sentong nung Nagaland PWD Mechanical & Housing Minister – Tongpang Ozüküm jaoka lir.

Iba den Nagaland Rural Development Minister – Metsübo Jamir, Treasuries & Accounts, National Highways Advisor – Dr. Longrineken, Industries & Commerce, Labor & Employment, Skill Development & Entrepreneurship Advisor – Imnatiba, MLA Moatoshi Longkumer, Nagaland Chief Secretary – Temjen Toy IAS aser Mokokchung D.C – Limawabang Jamir (NCS) parnoki tayongzükba o jembitsü sentong nung amshia lir.
Shisalemsabang sentong balala nung shisalen tuyurtemji; Nagaland University nung RDC, Dean – Prof. B. Kilangla Jamir, Mokokchung Chamber of Commerce & Industries President – Tsükti Longkumer, ILANDLO Director – Imtisunep Longchar, Nagaland University Meriema nung Linguistic tesayur Asst. Prof. – Dr. Pangersenla Walling aser Tir Yimyim Editor – K. Temjen Jamir parnoki onük balala nung ajemdaker jembitsü.
Iba mungdang Jan 15 nüji aonung 5:00 ako nung tenzüktsü. Iba mungdang nung delegates meyi ana (2000) jaoka lir. Khar yim ya Mopungchuket ajanga ao nungbo kilometer 35 shi lir aser Mariani road agia Changki yim nungi ora kilometer 54 shi asütsü..