AIUDF MLA temi CAA anema longkak ait

Guwahati, January 13 (Agencies): All India United Democratic Front (AIUDF) züngsemtemi Citizenship (Amendment) Act (CAA), 2019 agientsü asoshi khanga Assam Legislative Assembly kima longkak aitogo.
CAA aser Assam nung kin trok nem ST jenjang agütsütsü asoshi ayongba special Assembly session magi tsüngda iba longkak aitba sentong ya ayongzüka agiogo. Assam nung kin trok yagi ST jenjang agütsütsü asoshi mapang talangka nungi khanga arudar.
Dhing MLA Aminul Islam-i ashiba agi, parnoki CAA dak sendakba nung sensak asemtsü asoshi anogo ana akhang saka anogo ka dang temelaba agütsü.
“Iba ajanga sorkar inyakyim jangjajangja sayur,” ta pai ashi.
Iba sülen MLA tem Assembly telungi CAA anema yimyim ayima ai aser iba ajanga Assembly minute 45 magiteti anena atatsüsa aküm.
AIUDF MLA tem sü tanak agi tebang zübanger Assembly telungi ai.
Kasa mapang nung AIUDF lenirtemi, Assam Accord ashioktsüba atema chief minister Sarbananda Sonowal mapa nungi anentsü asoshi khangogo.
Iba accord ya India sorkar aser All Assam Students’ Union (AASU) na tsüngda yanglu aser Sonowal-a iba kaketshir lokti tentet tir liasü.